Жол ережесін енді камералар да бақылайды

12 наурыздан бастап жол қозғалыс ережелерін бақылау жүйесіндегі жаңа өзгеріс күшіне енді. Енді бейнекамералар кейбір құқық бұзушылықтарды автоматты түрде анықтай алады.

Әкімшілік құқық бұзушылық ту­ралы кодекстің 31-бабына енгізілген түзетулер «цифрлық кодекспен» бай­ланысты. Қабылданған түзетуде жаңа айыппұлдар немесе жүргізушілерге қосымша талап емес, тек құқық бұзу­шы­лықтарды анықтау тәсілі цифрлық жүйеге көшті. Мәселен, бұған дейін полиция қызметкеткерлері рөлде отырып телефон пайдалану, қауіпсіздік белдігін тақпау, сыртқы жарық құралдарын дұрыс пайдалан­бау, жолда кептеліс тудыру сияқты құқық бұзушылықтарды қолмен тіркейтін. Енді мұн­дай жағдайларды заманауи техникалық құралдар ар­қылы автоматты түрде анықтайды.

Күшейтілген бақылауға сәйкес тір­кеудің үш тәсілі бар. Қалалардағы орнатылған камералар бұрынғыдай жұмыс істейді, бірақ олардың функ­ционалы кеңейтіледі. Құжаттарға бай­ла­нысты құқық бұзушылықтарды анық­тауға дерек базалары пайдаланылып, техникалық байқаудың мерзімі өткен, сақтандыру полисінің болмауы, қаруды сақтауға берілген рұқсат мерзімінің аяқталуы сияқты ережелердің орын­далмауын автоматты түрде анықтайды. Бұрын мұндай жағдайларда полиция қызметкері қатысып, істі қолмен рәсімдейтін еді.

ҚР ІІМ ӘПК-нің ерекше тапсыр­ма­лар жөніндегі аға инспек­торы Ақтоты Боранованың айтуынша, бұл шара­лар өмірі мен денсаулығын қорғап, құқық бұзушылықтың алдын алып, тұрғын үй аумақтарында қауіпсіз орта қалыптастыруға бағытталған.

– Жүргізушілер үшін бұрын қан­дай талап болса, қазір де сол талап. Айырмашылығы, енді оларды бақы­лау заманауи цифрлық технологиялар арқылы жүзеге асады. Яғни заң талаптары өзгермей, тіркеу тәсілдері жаңартылады. Сонымен бірге заңнамада ескерту қарастырыл­ған құқық бұзушылықтар бойынша жаңа жүйе автоматты түрде ескерту жібере алады, – деді маман.

Бұл өзгерістер ереже бұзбай­тын жүргізушілер үшін қиындық тудырмай, керісінше, жолдағы тәртіп күшейеді.

Әлеуметтік желілерде «камералар жаяу жүргіншілерді жазалайды» деген ақпа­рат тара­ған еді. ІІМ-нің өкілі Ақтоты Боранова бұл ақпа­раттың шындыққа жанаспайтынын айтты. Авто­матты камералар жаяу жүргіншілерді жауап­кершілікке тартуға ар­налмаған. Жүйе тек жол қозғалысы ережелерінің бұзылуын анықтайды.

«Ақмешіт-ақпарат»

Суретті түсірген Н.НҰРЖАУБАЙ

Жылдам ақпарат алу үшін Facebook, Instagram желілері мен Telegram каналымызға жазылыңыз!