Биыл жаз маусымы басталмай күннің қатты ысып кетуі төтеншеліктердің де жұмысын оңайға соқтырмай отыр. Жылда Сырдария өзеніндегі белгіленбеген жерге шомылған азаматтардың түрлі себеппен қайғылы жағдайға ұшырауы өз өміріне салғырт қарауынан, мектеп жасындағы балаларға ата-ана тарапынан бақылаудың жоқтығынан екенін айтып төтеншеліктер дабыл қағуда.
Мамандардың айтуынша, жыл басталғалы облыс аумағындағы су айдындарында 3 адам қаза болса, оның 1-і бала екендігі анықталып отыр. Сөзіміз дәлелді болу үшін айта кетейік, өткен жылы 24 адам тілсіз жаудың құрбаны болса, оның 11-і бала екен. Құтқарушылардың жедел әрекетінің арқасында 9 адам ажалдан аман қалған.
– Адамдардың суға кетуінің негізгі себебі – қауіпсіздік ережелерін өрескел бұзуы. Өзен немесе арнаның, зерттелмеген ағысы жылдам, терең, тік жар жеріне шомылуы, ішімдік ішіп, балалардың ересектердің бақылауынсыз суға түсуі және жүзе білмейтіндігі мәселені күрделендіріп, қайғылы оқиға орын алуда. Бұған қоса, қауіпті аймақта рұқсат етілмеген жүзу құралын қолдануы бақытсыз жағдайдың санын көбейтуде. Сонымен қатар соңғы жылдары ұжым мен оқу орындарындағы жастардың демалысын өзен мен көл жағасында ұйымдастыруы жиілеп кетті. Салдарынан демалыстың соңы бақытсыз жағдаймен аяқталуда. Рұқсат етілмеген су айдындарында терең жерлерден барынша сақтанған жөн екендігін ескертіп, суға шомылуға тыйым салынған 63 қауіпті аймақтың тізімі тіркеліп, 149 ескерту тақтайшасы мен 92 бильборд орнатылған. Тұрғындардың қауіпсіздігін қамтамасыз ету мақсатында күнделікті тәулік бойы жауапты сала мамандарымен бірге полиция департаменті, жергілікті атқарушы орган қызметкерлері және еріктілермен 201 рейдтік жұмыс ұйымдастырылып, 20 мыңнан астам тұрғынға судағы қауіпсіздік ережесі түсіндіріліп, үнпарақ таратылды. Сондай-ақ профилактикалық жұмыстарға 225 еріктілер жұмылдырылды, – дейді облыстық төтенше жағдайлар департаменті азаматтық қорғаныс басқармасы бастығының міндетін атқарушы Ғафур Ақмырзаев.
Суға түсуде сала мамандары айтқан сақтық шараларын қаперге алып, әсіресе балалар өміріне сақ болу керек. Қазақтың «Сақтансаң сақтаймын» деген тәмсілі осындайда айтылса керек. Балалар өмірі бәрінен қымбат екенін есте ұстайық.
Гауһар АСҚАРҚЫЗЫ
Жылдам ақпарат алу үшін Facebook, Instagram желілері мен Telegram каналымызға жазылыңыз!