Қалада санитарлық талаптардың сақталуын қамтамасыз ету үшін рейд апта сайын жүргізілуде. Тұрғындар мен кәсіпкерлердің санитарлық ережелерді сақтауын қадағалау мақсатында жұмысшы топ бұл жолы қаланың орталық көшелерін аралады.
Қала әкімдігі жанына құрылған жұмысшы топ қала тазалығына баса мән беруде. Бақылау шарасында сауда орталықтары, тұрғын үйлер, кәсіпкерлік нысандардың санитарлық ахуалын бағамдап, мәселені дер кезінде шешуге бағытталады. Тұрғындардың жайлы өмір сүруіне ыңғайлы жағдай жасау, қала көшелерінің көрінісін жақсарту, қаланың көркеюіне үлес қосу рейдтік іс-шараның басты мақсаты.
Аралау барысында А.Пушкин, Ж.Қизатов, Т.Жүргенов, Ғ.Мұратбаев көшесіндегі санитарлық талаптарды сақтамаған кейбір тұрғындарға ескерту берілді. Құрылыс қалдықтарын жол бойында қалдыру, көше аумағын ластау әрекеттері анықталған азаматтарға әкімшілік шара қолданылатыны ескертілді. Жұмысшы топ бақылау барысында азаматтарға қаланың көрінісін жақсартуға жауапты екенін түсіндірді.
Мұндай іс-шаралар арқылы қоғамда санитарлық талаптарды сақтау маңыздылығы артады. Сонымен бірге тазалық мәдениеті қалыптасатыны белгілі. Жұмысшы топтың түсіндірме, ескерту шаралары арқылы қаланың көркі мен тұрғындардың өмір сапасы жақсарады.
– Қала әкімдігі жанына құрылған жұмысшы топпен бірге қала көшелеріндегі санитарлық талапта сақтамаған тұрындарға ескерту жасалды. Абаттандыру қағидасын бұзған 12 нысан бойынша түсіндірме жұмыс және 2 нысанда полиция қызметкерлерімен бірге хаттама толтырылды. Қала тазалығын қамтамасыз ету үшін рейд жұмысы алдағы уақытта әлі де жалғасады, – деді қалалық сәулет және құрылыс бөлімінің маманы Сауран Айдосұлы.
Қала әкімдігі тұрғындар мен кәсіпкерлерді санитарлық тазалыққа көңіл бөлуге шақырады. Қалада құрылыс жүргізіп жатқан, алдағы уақытта жоспарлап жатқан азаматтарға абаттандыру қағидасын бұзбауды ескертті. Рейдтік іс-шаралар жүйелі түрде өткізіліп, шаһардағы санитарлық ахуалды тұрақты бақылауда ұстау көзделіп отыр.
Ақмешіт-ақпарат
Жылдам ақпарат алу үшін Facebook, Instagram желілері мен Telegram каналымызға жазылыңыз!