Бүгінде тұмау және жедел респираторлық вирустық инфекциялардың (ЖРВИ) өршуіне байланысты өңірде эпидемиологиялық маусымға дайындық жұмыстары күшейтілуде. Бұл туралы Қызылорда қалалық санитариялық-эпидемиологиялық бақылау басқармасының басшысы Бейбіт Бидаш пен «Ұлттық сараптама орталығы» облыстық филиалының директоры Фарида Қалиева брифингте айтты.
Денсаулық сақтау басқармасының мәліметіне сүйенсек, 2025 жылдың 10 айында қала бойынша ЖРВИ-дің 77612 жағдайы тіркелген. Оның 48037-і – 14 жасқа дейінгі балалар. Ал 100 мың тұрғынға шаққандағы жалпы аурушаңдық көрсеткіші – 20352,4 болса, балалар арасындағы көрсеткіш 38374,6. Бұл өткен жылмен салыстырғанда 10,4%-ға төмен. Сондай-ақ жыл басынан бері тұмаудың 53 жағдайы анықталып, олардың 35-і балалар арасында тіркелген. Аталған көрсеткіш өткен жылмен салыстырғанда 29,5%-ға азайып отыр. Эпидемиялық маусымда тұрғындар арасында 10450 ЖРВИ және 49 тұмау жағдайы тіркелген. Ал жаңа оқу жылының алғашқы екі айында қаладағы 56 мектепте 1822 оқиға орын алған. Дегенмен бұл эпидемиологиялық нормадан аспайды.
Вакцинация – ең тиімді қорғаныс құралы
Мамандар тұмаудан сақтанудың ең тиімді жолы дер кезінде вакцина алу екенін айтты. ҚР Бас мемлекеттік санитариялық дәрігерінің 2025 жылғы тамыздағы қаулысына сәйкес, 23 қыркүйектен бастап Қызылордада қауіпті топтар арасында 36910 азамат «Гриппол плюс» вакцинасын алған. Одан бөлек, қаладағы түрлі мекемелер өз қызметкерлерін екпемен қамтамасыз ету жұмыстарын ұйымдастырып, жұмыс берушілердің есебінен 1520 қызметкерге вакцина егілген. Сонымен қатар «Интертич» ЖШС клиникасымен мұнай компанияларының 520 қызметкері тұмауға қарсы вакцина қабылдаған.
– Вакцинация ауыр ағымдағы тұмаудың алдын алып қана қоймай, асқынулардың пайда болу ықтималдығын бірнеше есеге төмендетеді. Медициналық тұрғыда вакцина жай ғана екпе емес, қауіптің алдын алатын қорғаныс. Қазіргі таңда вирустық инфекциялардың басым бөлігі 14 жасқа дейінгі балалар арасында жиі тіркелуде. Әдетте ата-аналар тарапынан, тіпті ересектердің өздері де вакцинацияға қарсылық танытып, өз бетінше емделуді жөн көреді. Алайда бұл дұрыс шешім емес, – дейді Қызылорда қалалық санитариялық-эпидемиологиялық бақылау басқармасының басшысы Бидаш Бейбіт.
Зертханалар эпидемиялық маусымға дайын
Қызылордадағы вирусологиялық зертхана эпидемиологиялық маусымға толық дайын. Материалдық-техникалық база жаңартылып, реактивтер мен зертханалық жабдықтардың қоры толықтырылды. Қазіргі таңда зертханада үш заманауи ПТР аппараты жұмыс істейді. 2025 жылдың 26 қыркүйегінен бері облыс бойынша 3418 зерттеу жүргізіліп, оның ішінде тұмау А типі 86, ЖРВИ 8, COVID-19 ауруы бойынша 2 жағдай расталған.
– Қызылорда қаласындағы вирусологиялық зертхананың эпидемиологиялық маусымға дайындығы толық қамтамасыз етілді. Алдымен материалдық-техникалық база жаңартылып, барлық зертханалық жабдықтардың жарамдылығы тексерілді және қажетті реактивтер мен шығын материалдарының қоры толықтырылды. Сонымен бірге қызметкерлердің біліктілігі арттырылып, вирусологиялық диагностика мен биологиялық қауіпсіздік ережелері бойынша қайта даярлау курстары өткізілді. Бұл мамандарымыз үшін ғана емес, пациент үшін де тиімді болмақ. Зертханалық диагностика алгоритмдері жаңартылды. Осы тұста емдеу-сауықтыру мекемелерінің мамандарына «Зертханалық сынама алу, сақтау және тасымалдау тәсілдерін меңгеру» тақырыбында облыстық тренингтер ұйымдастырылуда. Бұдан бөлек, биологиялық қауіпсіздік шаралары күшейтіліп, зертханада дезинфекциялау тәртібі қайта қаралуда, – дейді «Ұлттық сараптама орталығы» облыстық филиалының директоры Фарида Қалиева.
Айта кетерлік жайт, жіберілген сынамалар Ұлттық референс зертхана тарапынан толық расталып, зертхана жұмысының сапасы жоғары деңгейде екені дәлелденді. Зертханада мониторинг және профилактикалық шаралар үздіксіз жүргізіліп, биологиялық қауіпсіздік талаптары күшейтілген.
Мамандар кеңесі: Өздігінен ем қабылдамаңыз
Дәрігерлер тұрғындарға тұмау белгілері пайда болған жағдайда өздігінен ем қабылдаудан аулақ болуды ескертеді. Өйткені уақытылы медициналық көмек көрсетілмесе, ауру асқынып, тыныс алу, жүрек-қантамыр және жүйке жүйесі ауруларына алып келуі мүмкін. Осыған байланысты мамандар тұмаудың алғашқы белгілері байқалса, бірден дәрігерге жүгінуге шақырады. Әсіресе балалар, жүкті әйелдер, созылмалы ауруы бар адамдар және қарттарға бейжай қарауға болмайтынын ескертеді.
Айдана БАҚЫТЖАНҚЫЗЫ
Жылдам ақпарат алу үшін Facebook, Instagram желілері мен Telegram каналымызға жазылыңыз!