Асқар Тоқмағамбетов атындағы мәдениет үйі жанынан ашылған «Ұлағат» ансамблі бүгінде өнерсүйер қауымға танылып үлгерді. Түрлі жастағы өнерпаз ардагерлер қалада өткізілген түрлі мәдени іс-шарада өнер көрсетіп, көрерменнің разылығына бөленіп жүр.
Ансамбль жетекшісі Балқия Құрмашова жасы 80-ге жақындаса да өзінің ізденімпаз, іскерлік қабілетімен ерекшеленіп, өнер өлкесіне танылған жан.
Кезінде талант иесі отбасылық ансамбльмен бірге Алматыда өнер көрсетіп, теледидар мен радиода терме айтып, халыққа кеңінен танылған. Өнер жанашыры қарттығына қарамастан бүгінде «Ұлағат» ансамблінің жетекшісі.
– Ансамбль құрамында жырау, термеші, жыршы қармақшылық Қасарбек Кәрібаев, композитор Керекжан Құлмырзаев композитор, өнерлі ерлі-зайыпты Дастан Тұрсынбаев пен Балмекен Нұрділдаева бар.
Мәдени іс-шараны жүргізу үшін де үлкен талант, актерлық шеберлік қажет. Концерт жүргізуші Ізімкүл Төребайқызы көрерменін жалықтырмайтын ізденгіштігімен ерекшеленеді. Бұрын теміржол санаторийінде көркемөнерпаздар тобына жетекшілік жасаған өнер иесінің өзі де ән айтып, би билеп, айналасына шуақ шашқан жан.
Ардагер-ұстаз Гауһар Қарғабекова кезінде «Нұргүл» ансамблінің мүшесі болып, «Алтыбақан» телебағдарламасына түсіп, 1976 жылы ансамбль құрамымен Германияда гастрольдік сапарда болып, қазақ өнерін паш еткен өнер майталманы.
Гауһар АСҚАРҚЫЗЫ
Жылдам ақпарат алу үшін Facebook, Instagram желілері мен Telegram каналымызға жазылыңыз!