Қаладағы А.Байтұрсынов атындағы №211 орта мектептің қазақ тілі мен әдебиеті пәнінің мұғалімі Айман Абасилова «Үздік педагог – 2025» республикалық байқауының облыстық кезеңінде топ жарды. Сонымен қатар ұлағатты ұстаз 2025 жылдың қорытынды шарасында қала әкімінің «Жыл ұстазы» номинациясымен марапатталды.
Айман Жақанқызы Алматы мемлекеттік педагогикалық университетін қазақ тілі мен әдебиеті пәні мұғалімі біліктілігі бойынша бітірген. 33 жыл уақыт ішінде ұстаздық қызметті атқарып, шәкірт тәрбиелеуде еңбек етіп келеді. Қазіргі таңда бұл мектепте 8888 оқушы білім алуда. Барлық мұғалім білім жетілдіру курстарынан өтіп, жаңартылған білім беру мазмұны бойынша сабақ беруде. Президент Қасым-Жомарт Тоқаевтың «Тіл мәртебесін» көтеру бағытында айтылған жұмыстарын үздіксіз жалғастыру, қазақ тілін үйрену сапасын арттыру, оқу сауаттылығын дамыту мақсатында Қызылорда облысының білім басқармасы басшысының 17 желтоқсан 2024 жылғы 116-нқ/1 бұйрығымен мектеп «Тіл білімі мектебі» тірек мектебі болып бекітілген. Қазіргі таңда мектепте жоба аясында ауқымды жұмыстар қолға алынып, жүзеге асуда. Жоба аясында мектепте 6 ғылыми-зерттеу зертханасы және Қазтест орталығы жұмыс істейді. «Тіл білімі» мектебін жобасын жүзеге асыру бойынша мектеп мұғалімі Айман Абасилова мектеп баспасының 8-сыныбына арналған «Қазақ тілі оқулығы мен оқу-әдістемелік кешендерінің» авторлар құрамына енеді.
– Мұғалім болу – өзімнің таңдауым. Бала тәрбиелеу, оларға білім берудің қаншалықты маңызды екенін терең түсіндім. Мұғалім болу арқылы ұрпақ тәрбиесіне өз үлесімді қоссам деген мақсат болды. Бұл жолда өзімнің қолтаңбамды қалдыру мақсатында еңбек етіп келемін. Ұстаздық қызметімде тілдік білім мазмұнын жаңғырту, оқушылардың функционалдық сауаттылығын арттыру, кіріктірілген оқытуды дамыту бағытында нәтижелі жұмыстар жасалды. Әсіресе, сабақта заманауи педагогикалық әдістерді тиімді қолдана отырып, оқушының зерттеушілік дағдыларын дамытуға ерекше көңіл бөлемін. Ғылыми-шығармашылық қызметінде пәнаралық байланысты күшейту, тілдік дағдыларды қалыптастыру, білім алушылардың зерттеу мәдениетін арттыру мәселелеріне арналған әдістемелік материалдар мен баяндамалар әзірлеп, жариялап келемін. Республикалық және облыстық ғылыми-тәжірибелік конференцияларға қатысып, педагогикалық тәжірибемді әріптестер арасында тараттым. Білім беру ұйымдарында ұйымдастырылған семинарлар мен тәжірибе алмасу алаңдарында өз әдістемелік ізденістерімді ұсынып, педагогтерді кәсіби қолдауға үлес қостым. Қазақ тілі пәні мұғалімдерінің кәсіби дамуына бағытталған оқу-әдістемелік шараларға қатысып, өз тәжірибемді тұрақты түрде жетілдіріп келемін. Еңбек нәтижелерім оқушылардың жетістіктерінен айқын көрінеді. Бұл марапат – мен үшін үлкен жауапкершілік. Ең алдымен, шәкірттерімнің жетістігі мен қолдауының нәтижесі. Ұстаз үшін бұдан асқан марапат жоқ, – дейді Айман Жақанқызы.
Ізденіспен, терең біліммен еңбек еткеннің нәтижесінде ұлағатты ұстаз көптеген жетістікке қол жеткізді. Оның бәрін тізбектеп шығу мүмкін емес. Дегенмен, ғылыми-шығармашылық және кәсіби жетістіктері бойынша педагог-зерттеуші мәртебесін алды. Ғылыми-әдістемелік жұмыстары жарық көрді. Оқушылары үздік нәтиже көрсете білді. Мұның өзі мұғалімнің үздіксіз жұмыс істеуінің нәтижесі. Сонымен қатар 2018 жылы қалалық білім бөлімінің Құрмет грамотасымен марапатталса, одан бөлек жыл сайын облыстық білім басқармасының Алғыс хаты және Құрмет грамоталарымен марапатталған.
– Өткен жыл аяғында мектебіміз үшін керемет жаңалық болды. Қазақ тілі мен әдебиеті пәнінің мұғалімі, білім мен сөз өнерінің шынайы жанашыры Айман Жаханқызы «Үздік педагог – 2025» республикалық байқауының облыстық кезеңінде топ жарып, облыс әкімінің 1179600 теңге көлеміндегі сыйақысына ие болды. Сонымен қатар қала мектептері арасында үздік деп танылып, қала әкімінің «Жыл ұстазы» номинациясымен марапатталды. Бұл – жай ғана жеңіс емес, бұл – ұстаздық жолдағы табандылықтың, жаңашыл ойдың және шығармашылық қуаттың салтанаты. Бір күннің емес, жылдар бойғы тынымсыз еңбектің, үздіксіз ізденістің және терең білімнің әділ бағасы. Айман Жаханқызы – тек пән мұғалімі емес, ол – ұлттық рухты сөз өнері арқылы шәкірт жүрегіне сіңіре білетін рухани жетекші. Әр сабағы ойға жетелейтін, талдауға үйрететін, оқушының ішкі әлеуетін ашатын шығармашылық алаң. Ұстаздың жан-жақтылығы оның әдістемелік шеберлігінен, креативті жобаларынан, оқушы жетістіктерінен айқын көрінеді. Әдебиетті өмір айнасы, тілді ұлт жаны ретінде таныта отырып, ол шәкірттеріне тек білім ғана емес, құндылық пен бағыт беруде. Жыл қорытындысы бойынша үздіктер қатарынан көрініп, мектеп мерейін асқақтатқан Айман Жаханқызының жетістігі – бүкіл ұжым үшін үлкен мақтаныш, жас мамандар үшін үлгі, оқушылар үшін шабыт көзі, – дейді мектеп директоры Айжан Шорабекқызы.
Айтолқын АЙТЖАНОВА
Жылдам ақпарат алу үшін Facebook, Instagram желілері мен Telegram каналымызға жазылыңыз!