Жаңа кітаптың тұсауы кесілді

Ата заңымыздың 30 жылдық мерекесі қарсаңында 29 тамыз күні облыстық Полиция департаментінің үлкен мәжіліс залында сала ардагерлер мен қызметкерлер құрамының қатысуымен құқық қорғау саласында қырық алты жыл, Полиция департаментінің заң бөлімі бастығы лауазымында жиырма үш жыл қызмет атқарған әріптесіміз, запастағы полиция полковнигі  Хұсайын Қоразбаевтың «Офицер жазбалары» атты кітабының  тұсауы кесілді.

Жинақтың алғы сөзі Қорқыт ата атындағы Қызылорда университетінің профессоры, филология ғылымдары­ның кандидаты Ғабит Тұяқбайдың «Өре мен өріс» атауымен аталған. Тіл маманы Ғ.Тұяқбай алғысөзде төмендегідей пікір білдірген: «Өз тарихымызды зерттеу, зерделеу тек кәсіби тарихшының ғана міндеті емес, автор өзін «Мен – қазақпын» деп танитын қазақтың, өзін ұлт­жанды азаматпын деп есептейтін әр азаматтың, таным көкжиегін кеңейткісі келетін әр тұлғаның ха­лық алдындағы перзенттік бір пары­зы екенін білдіреді. Жинаққа ен­ген ұлт тарихына зерттеулер мен сарап­тамалық мақалалар қаламгердің бойын­дағы осындай қасиеттердің тоғыс­қандығының айғағы. Тарихты білу – өткенді зерттеу ғана емес, одан сабақ алу, болашақты саралау. Тарих – бұл халықтың рухани тірегі, ұлттың тұтас­тығы мен дамуының қайнар көзі. Әрбір тарихи оқиға-уақыттың айна­сы, ал сол оқиғаларды түсініп, олар­дың мән-мағынасын ашу – бүгінгі және келер ұрпақтың басты міндеті».

Жинақтағы материалдар зерттеу­шілерге, ұстаздарға, сондай-ақ халқы­мыздың ұлы перзенттері туралы тереңірек білгісі келетін барлық оқыр­манға арналған. Кітаптың басты мақсаты оқырманға жаңа идеялар ұсынып, ой-өрісін кеңейту, ғылыми және танымдық ақпараттарды жүйе­леу.  Оқыған, ізденген, зерттеген адам ешқашан адаспайды, себебі білім мен ғылым жолы – болашаққа бастар жол.

Кітапқа автордың ұзақ жылдар бойғы құқық қорғау саласындағы қызмет кезіндегі орын алған атышулы қылмыстар мен тергелген қылмыстық істер, жаңадан қабылданған заңдар, тарихи зерттеулер мен портреттік очерктер енгізілген. Жинаққа енген мақалалар автордың талай жылғы өмірлік тәжірбие мен дүниетамы­ның, зерттеу мен зерделеудің, ой мен толғаныстың нәтижесі екені анық. Автордың әр мақаласы өмір­дегі өзекті мәселені көтере алуымен, сол арқылы оқырманға ой салуымен құнды. Автордың ұлт тарихына деген қызығушылығы, өзінің о баста алған білімін жетілдіре оты­рып, зерттеушілікке ұластыра алған­дығы өре биіктігі мен өрісінің кеңдігін көрсетсе керек. Зерттеу мақа­лаларында қазақ халқының қалып­тасу кезеңдері, мемлекет құру жолындағы күрестер, елдің саяси, әлеуметтік, мәдени даму ерекше­ліктері және ұлы тұлғалардың, мем­лекет қайраткерлері, ел қорғаған ба­тырлар, ағартушылар, дарын иелері, ұлтымызды жаңа деңгейге көтеруге күш салған азаматтардың өмірі мен қызметі туралы құнды деректер қамтылған. Сонымен қатар кітап беттерінен жаһандық оқиғалар мен олардың қазақ даласына тигізген ықпалын, халқымыздың әлемдік өр­кениеттегі орнын айқындайтын мәлі­меттерді табасыз. Бұл жинақ студенттерге, заңгерлерге, құқық қорғау саласы қызметкерлеріне, зерт­теушілерге, ұстаздарға, сондай-ақ халқымыздың ұлы перзенттері туралы тереңірек білгісі келетін бар­лық оқырмандарға арналған.

Осындай құнды дүниені жарық­қа шығарған Хұсайын Қоразбаев ішкі істер органдары мен мем­лекеттік қызметтегі ұзақ, мінсіз қызметі мен жеткен жетістіктері үшін қызмет барысында 63 рет марапатталған. Оның қатарында үлгілі қызметі үшін КСРО Ішкі істер министрі милиция армия генералы Н.А.Щелоковпен «алғыс» жарияланған. Бірнеше рет Қазақ КСР, Қазақстан Республика­сы ішкі істер министрлігінің, Қызылорда облысы мен  қалалық әкімдерімен, Полиция департаменті мен Ресей Федерациясы Байқоңыр қалалық әкімшілігі басшысы мен ішкі істер министрлігінің Байқоңыр комплексі ішкі істер басқарма­сы басшылығымен грамотолармен, ал­ғыс хаттармен және көптеген ме­дальдерімен марапатталған.

Жинаққа бұрын «Заң» респуб­ликалық құқықтық ғылыми-прак­ти­калық журналына, «Егемен Қазақстан», «Заң», «Сақшы», «Түр­кістан», «Президент және Халық», «Айқын», «Жеті жұрт», «Сыр бойы», «Ақмешіт ақшамы», «Ақмешіт апталығы», «Ақмешіт Ардагері», «Ақмешіт жастары», «Жалағаш жаршысы», «Өскен өңір», «Тіршілік тынысы» тәрізді басы­лымдарда жарияланған Қазақ ССР ішкі істер министрінің бұрынғы орынбасары, милиция генерал-майоры Н.Алмағанбетов, Қазақстан Республикасы Парламент Сенатының бұрынғы депутаты И.Амиров, Шиелі аудандық Полиция бөлімінің бұрын­ғы учаскелік полиция инспекторы, II дәрежелі «Айбын» орденінің иегері, полиция лейтенанты Т.Қозыбаев, Орта Азия Әскери округінің бұрын­ғы қолбасшысы, армия генералы В.Лобов (жүргізілген журналистік зерттеу нәтижесімен), қазақтың белгілі батырлары, тұлғалары туралы Қазақстан тарихы, т.б. әртүрлі тақы­рыптарға қатысты мақалалары жарияланған.

Жинақта жарияланған «Мұхаммед пайғамбар және түрік­тер», Қосым қожа, Бармақ, Сәрке батырлар, Жүзжасар би, 1986 жылғы «Желтоқсан оқиғасы» мен осы  оқиғалар бары­сында  алаңға шыққан жастарды басып-жаншып, халыққа айдап салу туралы Кремль бұйрығын орындаудан бас тартқан кеңес генералы В.Лобов, қазақты қырғынға ұшыратқан жоңғар-қалмаққа зеңбірек жасап берген швед офицері туралы «Ренат Ресей тыңшысы ма?», «Егемен Қазақстан» газетінде жарияланған қазіргі заманда жастар денсаулығын құртып жатқан газды сулар туралы «Сергіткіш сусынның зияны», облысымызда орын алған такси жүргізушілерінің өлтірілу қылмыстары, өзі қоғамдық тәртіпті қамтамасыз етуге қатысқан 1980 жылғы Мәскеу Олимпиадасы туралы, тағы да менің көңілімнен шыққан басқа да мақалалар оқырманға жүрегінен орын алатынына сеніміміз кәміл.

Жылдам ақпарат алу үшін Facebook, Instagram желілері мен Telegram каналымызға жазылыңыз!