Қала күні қарсаңында аймақтың әлеуметтік-экономикалық әлеуетін арттыру бағытында көптеген жоба жүзеге асуда. Соның ішінде қала тұрғындары үшін ең ауқымды нысандардың бірі – 11 мың орындық халықаралық деңгейдегі жаңа стадионның ашылуы.
Жаңа спорт аренасы халықаралық стандарттарға толықтай сай салынған. Алаңның жасанды жабындысы арнайы Еуропадан әкелініп, FIFA және UEFA талаптарына сәйкестендірілген. Әлемдік стадиондардан еш кем түспейді. Жаңа стадион – тек футбол алаңы ғана емес, көпфункционалды спорт кешені. Мұнда бокстан бастап, дзюдо, грек-рим және еркін күрес, таеквандо, спорттық гимнастика, ауыр атлетика, фитнес сияқты бағыттар қамтылған.
Ғимараттың бірінші қабатында спортшыларға арналған кең жаттығу залдары орналасса, екінші қабатында әкімшілік және техникалық бөлмелер бар. Үшінші қабат баспасөз конференциялары мен түрлі жиындарға арналған заманауи зал ретінде жабдықталған.
Бұл кешеннің басты ерекшелігі – халықаралық деңгейдегі футбол матчтарын өткізуге ресми рұқсат алуы. Бұл дегеніміз, енді Сыр өңірінде елдік, тіпті әлемдік спорттық іс-шаралар ұйымдастыруға толық мүмкіндік бар.
Қызылорданың ғасырлық мерейтойымен тұспа-тұс салынған бұл стадион – өңір спортының жаңа тынысына дем берді. Қала бүгінде мәдениет пен спортты қатар дамыту арқылы елдің еңсесін көтеріп, жаңа дәуірге нық қадам басуда. Мерейтой жылы аясында ашылған әрбір жаңа нысан – Сыр елінің серпінді дамуының көрінісі саналмақ. Қала күні мерекесінде тұрғындар жаңа стадионда өнер жұлдыздарының концертін тамашалады.
Бетті әзірлеген Г.ҚОЖАХМЕТОВА,
А. АЙТЖАНОВА,
А.БАХТИЯР
Жылдам ақпарат алу үшін Facebook, Instagram желілері мен Telegram каналымызға жазылыңыз!