Соңғы күндері Жалағаш ауданы тұрғындарын төрт түліктен жұқпалы ауру тарады деген ақпарат дүрліктірді. Мал шаруашылығы тіршіліктің өзегіне айналған халық үшін бұл елең еткізер жағдай екені белгілі. «Мал саулығы – ел саулығы» деп санаған жұрттың алаңдауы да орынды. Осыған байланысты өңірлік коммуникациялар қызметі алаңында брифинг өтті. Брифингке облыстық ветеринария басқармасының басшысы Шахмардан Сұлтанбекұлы қатысты.
Қаңтардың 5-і республикалық 31 телеарнасында «Жалағашта жаппай мал қырылып жатыр» деген ақпарат тарады. Аудандағы мал ауруы туралы оқиғаға Жалағаш аудандық аумақтық инспекциясы, ветеринариялық станция мамандарынан құралған арнайы топ өкілдері жеке тұлғаға тиесілі аумаққа барып, тиісті зерделеу жұмыстарын жүргізген. Малдың жай-күйін анықтау мақсатындағы зерттеу барысында ауырды деген малдардан қан сынамалары алынған. Ауа райының күрт суытқанынан төрт түліктің жай-күйі төмендеді деген күдікпен олардың жем шөп, суынан да сынамалар алынып зертханаға өткізілді. «Жаппай мал ауруы болып жатыр» деген ақпарат шындыққа сәйкес келмейді» – деген Шахмардан Қойшыбаев қазіргі таңда эпизоотиялық ахуал тұрақты екендігін жеткізді.
– Жалағаш кентінің тұрғындары Ф.Бейсенованың 8 бас мүйізді ірі қарасы мен Қ.Жолдыбаевтың 7 бас мүйізді ірі қара малдары арнайы базаға тіркеліп, аса қауіпті ауруларға қарсы алдын ала екпе егілген. Бұл ретте бейнекөрсетілімде айтылғандай, мал жаппай қырылып, шығын орын алмаған. Қазіргі таңда күлдірік стоматит, вирустық диарея, инфекциялық ринотрахеит, аусылдың құрылымсыз ақуызы ауруына сынама алынып ветеринариялық зертханаға өткізілді. Аталған аурулардың клиникалық белгілері бір-біріне ұқсас. Ветеринар мамандар шұғыл әрекет жасап, мал иелерінің қора жайларына залалсыздандыру жұмыстарын жүргізді, – деді ол.
Осы мәселеге байланысты қаладағы төрт түліктің жай-күйі туралы қалалық ветеринария станциясынан сұрап білдік. Қызылорда қаласында аса қауіпті жұқпалы аурулардың алдын алу эпизоотиялық тұрақтылықты сақтау мақсатында 10 түрлі жұқпалы ауруларға республикалық бюджет есебінен өткен жылы 266,9 мың доза ветеринариялық препараттар ауылдық округтер мен кенттер бойынша егу жұмыстары жүргізілген. Малға уақытылы егу, ветеринарлық паспорт беруді, тағы да басқа жұмыстарды оңтайландыру үшін «Tort Tulik» мобильді қосымша іске қосылған.
– Осының арқасында ветеринарлық профилактикалық іс-шараларды толық көлемде жүргізуге мүмкіндік алып отырмыз. Қала бойынша эпизоотиялық ахуал тұрақты. Алдағы уақытта ветеринариялық бақылаудан өткен етті сату және сатып алу үшін «Tort Tulik» қосымшасына «sogym.kz» бөлімі ашылады. Сондай-ақ «vet.market» бөлімі арқылы ветеринариялық қызметтерді алу және жариялау мүмкіндігі туады. Бұл қосымша мал шаруашылығымен айналысатындар үшін ақпараттық жаңашылдық десем артық айтқаным емес. Қосымшада ветеринария саласының соңғы жаңалықтары мен алдағы егу жұмыстары тағы да басқа ақпараттар жарияланады, – дейді қалалық ветеринария станциясының басшысы Бауыржан Жәдігеров.
Думан КЕҢШІЛІК
Жылдам ақпарат алу үшін Facebook, Instagram желілері мен Telegram каналымызға жазылыңыз!