12 тамыз – Халықаралық жастар күніне орай өңірде кең көлемде аталып өтетін мәдени-көпшілік іс-шаралар легі бастау алмақ. Биылғы мерекелік бағдарламалар «Qyzylorda jastar fest» тақырыбында ұйымдастырылып отыр. «Qosyl» қалалық жастар ресурстық орталығының директоры Медет Жорабек жоспарланған іс-шаралар туралы БАҚ өкілдеріне берген брифингте баяндады.
– «Qyzylorda jastar fest» фестивалі – жастардың шығармашылық әлеуетін ояту, экологиялық мәдениетті қалыптастыру, салауатты өмір салтын насихаттау және ұлттық құндылықтарды дәріптеу бағытында ұйымдастырылып отыр. Жастар – ел ертеңі. Сондықтан олардың белсенділігін арттырып, қоғамдағы рөлін нығайту басты мақсатымыз, – деді орталық директоры Медет Ерданаұлы.
Мәдени-көпшілік іс-шаралар 8 тамыз күні «Табиғатты сақта – болашақты қорға» атты экологиялық сайыспен басталады. Бұл іс-шара – жас ұрпақтың табиғатқа деген жанашырлығын арттырып, қоршаған ортаға деген жауапкершілігін оятуға бағытталған. Экосайыста әр топ 10 адамнан құралады. Қатысушылар арнайы белгіленген аумақтан қалдықтарды сұрыптап жинауы тиіс. Қоқыстарды бөлек-бөлек арнайы қаптарға салуы тиіс. Іс-шара барысында медициналық қауіпсіздік толығымен қамтамасыз етіледі. Арнайы құрылған комиссия мүшелері қазылық етіп, жеңімпаздарға ақшалай жүлде табысталады.
Іс-шаралар легі 9 тамыз күні де жалғасады. Бұл күні заманауи би өнеріне қызығушылық танытатын жастар үшін ерекше мүмкіндік туып отыр. «Qyzylorda youth fest» аясында би топтары мен талантты бишілердің өнер додасы өтеді. Түрлі заманауи бағытты меңгерген жастар өз өнерлерін ортаға салып, тартысты сайыс өткізбек.
Сонымен қатар қазақтың ұлы ақыны Абайдың 180 жылдығына орай «Абай сөзі» атты челлендж ұйымдастырылады. Жастар дана ақынның қара сөздерін жатқа айтып, Абай мұрасын насихаттауға өз үлесін қоспақ. Бұл бастама ұлттың рухани байлығын ұлықтауға бағытталған игі іс.
Ал 11 тамыз күні жастардың көшбасшысы Ғани Мұратбаевтың рухына тағзым ету шарасы өтеді. Бұл – өткенге тағзым ету арқылы болашаққа бағдар жасайтын маңызды іс-шара.
Осы күні «Қызылорда – жастар қаласы» атты фотокөрме байқауы да өтеді. Қаланың көркем келбетін, ерекше сәттерін суретпен сөйлеткен жас фотографтар қала тарихы мен бүгінгі келбетін өз көзімен көрсетеді. Бұл байқау шығармашыл жастардың көзқарасын, өнерге деген ықыласын айшықтайтын тамаша алаңға айналмақ.
Сондай-ақ мереке қарсаңында дене шынықтыру мен спортты насихаттауға арналған «Шыңды бағындыр» атты турникке тартылу сайысы өтеді. Бұл – жастарды спортқа баулуға бағытталған ерекше бастама.
Музыка өнеріне жақын жастар үшін де жағымды жаңалық бар. «Жұлдызды әуен жастармен бірге» атты акустикалық ән кеші ұйымдастырылады. Кеште жас әншілер өздерінің авторлық және танымал туындыларын шырқап, таланттарын көрерменге паш етеді.
Жастар мерекесіне арналған қорытынды кеш 12 тамыз күні өтеді. Бұл күні орталық алаңда «Qyzylorda youth fest» атты гала-концерт ұйымдастырылады. Сахна төрінде өңірдің үздік өнерпаздары, жас таланттары өз өнерін көрсетеді. Мерекелік кештің жұлдызды қонағы «BELLUCCI» тобы да өнер көрсетпек.
– Жастардың шығармашылығына жол ашып, қоғамдық өмірге белсене араласуына жағдай жасау біз үшін маңызды іс. Сондықтан барша қала жастарын халықаралық жастар күніне арналған іс-шараларға белсене қатысуға шақырамыз, – деді Медет Ерданаұлы.
Айдана Бахтияр
Жылдам ақпарат алу үшін Facebook, Instagram желілері мен Telegram каналымызға жазылыңыз!