Қала аумағындағы бірқатар көшелерде күрделі жөндеу жұмыстары басталды. «Қызылорда жолдары» серіктестігімен келісім-шарт жасалып, нәтижесінде 16 көшеге асфальт төселмек. Бүгінде алғашқы жөндеу жұмыстары басталып кеткен.
Осы күні Ақбастау-1, Ақбастау-2, Күдеріқожа Көшекұлы, Серімбетов және Арай-шағын аудандарында қиыршық тас төсеу жұмыстары жүргізілуде. Тұрғындар үшін бұл – көптен күткен қуанышты жаңалық. Бұрын бұл көшелерде көлік жүрісі қиындап, әсіресе жауын-шашынды күндері қатты қиналатын.
– Бұл жер белуардан батпақ еді. Жаңбыр жауса, лайға айналып кететін. Қазір жағдай біршама жақсарды. «Қызылорда жолдары» мекемесіне де, облыс, қала әкімдеріне де алғысымыз шексіз. Бұрын бұл көшеге көлік те келмейтін, қазір келіп жатыр. Енді бір аптадан кейін асфальт төселеді деп естіп отырмыз, – дейді Ақбастау-1 көшесінің тұрғыны Шерхан Қуанышов.
Осы жерге қоныстанғанына 6 жыл болған Шерхан сол уақыттан бері батпақпен алысып келеді. Мұндай жағдай Роза Сәдібекованың да басынан өтуде. Ол жол мәселесі көп жылдан бері титықтатқанын айтады.
– Көшемізге жол салынып, қуанып жатырмыз. Біраз қиналдық, жолымыз өте нашар еді. Осы істі қолға алған басшыларға да алғысымыз шексіз. Ең бастысы сапалы болсын, ұзақ жылдарға жарасын, – деді ол ризашылығын білдіріп.
Қала әкімдігі тарапынан бұл жұмыстардың сапасына ерекше көңіл бөлінуде. Жөндеу жұмыстары аяқталған соң, тұрғындардың жайлылығы мен қауіпсіздігі үшін қосымша абаттандыру шаралары да қолға алынбақ.
Камилла САҒЫНДЫҚ
Қорқыт Ата атындағы ҚМУ-дің
3-курс студенті
Жылдам ақпарат алу үшін Facebook, Instagram желілері мен Telegram каналымызға жазылыңыз!