Ақмола облысындағы Астана-Петропавл тас жолында болған ірі жол апатына ұшыраған көліктер саны 95-ке жетті. Ірі жол-көлік оқиғасынан кейін зардап шеккен 11 адам ауруханаға жеткізілді. Бұл туралы Stan.kz ақпарат агенттігі хабарлайды.
Полиция мәліметінше, 95 көліктің соқтығысуына жүргізушілердің белгіленген жылдамдықты сақтамауы себеп болды.
«3 қаңтарда сағат 07.20-да ауа-райының нашарлауына байланысты республикалық маңызы бар Астана – Петропавл (18–232 км) автожолының учаскесінде көліктің барлық түрлері үшін қозғалысқа шектеулер енгізілді. Сағат 12.30-да ауа-райы жақсарып, жол тазартылғаннан кейін полиция департаменті қызметкерлері мен «ҚазАвтоЖол» арнайы техникасының сүйемелдеуімен Астана қаласына қарай қозғалыс ұйымдастырылды. Алайда, жүргізушілердің белгіленген жылдамдық пен қауіпсіз қашықтықты сақтамауы салдарынан сағат 13.28-де тас жолдың 153-ші шақырымында, Жаңаталап ауылының маңында 95-ке жуық автокөліктің қатысуымен жаппай соқтығыс болған», – делінген хабарламада.
Сондай-ақ түрлі дене жарақатымен 11 адам ауруханаға жеткізілді.
«Жаппай апат салдарынан 11 адам түрлі дене жарақаттарымен Бұланды аудандық ауруханасына жеткізілді. Оның төртеуі ауруханаға жатқызылды», – деп хабарлады ведомстводан.
Төтенше жағдайлар министрлігінің мәліметінше, 70-тен астам адам жылыту орталықтарына жеткізіліп, азық-түлікпен қамтамасыз етілді.
Қазіргі уақытта жол учаскесінде зардаптарды жою жұмыстары жалғасып жатыр. Оқиға орнында полиция қызметкерлері, төтенше жағдайлар қызметі және «ҚазАвтоЖол» мамандары жұмыс істеп жүр.
Жылдам ақпарат алу үшін Facebook, Instagram желілері мен Telegram каналымызға жазылыңыз!