СПМК-70 тұрғын ауданынан 250 отбасыға баспана кілті табысталды. Жаңа пәтердің кілтін облыс әкімі Нұрлыбек Нәлібаев үй иелеріне салтанатты түрде табыстады.
Тұрғындарды баспанамен қамту мәселесі аймақта жолға қойылған. Оған жыл сайын зәулім үйлердің бой көтеруі дәлел. Соңғы жылда аталған ауданда салынған көпқабатты үйдің қатары артты. Соның бірі биыл қаланың 250 тұрғынына бұйырды.
Жиында жұртшылықты қуанышты сәтімен құттықтаған аймақ басшысы:
– Соңғы жылдары Сыр өңірінде тұрғын үй құрылысы қарқын алып, қала аумағы әлдеқайда кеңейді. Зәулім ғимараттар бой көтеріп, шаһардың сәулеттік келбеті көркейе түсті. Бүгін де жаңа тұрғын үйді пайдалануға беріп, отбасылардың қуанышын еселемекпіз.
Жаңа баспаналарыңыз татулық пен берекенің ордасы болып, қуаныш пен бақыт, құт пен ырыс салтанат құрсын! Қуаныштарыңыз көбейе берсін! Шаңырақтарыңызға шаттық орнасын! Сіздерді құттықтай отырып әр отбасыға жақсылық, ынтымақ пен бірлік, амандық тілеймін, – деп ізгі тілегін жеткізді.
Өз кезегінде қоныстанушылар пәтер іргесін қалаған құрылысшыларға алғыс білдіріп, еңбек ардагері Қорғанбек Қайруллаев ақ батасын берді.
Ресми мәліметке сүйенсек, үш жыл көлемінде өңірде бой көтерген тұрғын үйлердің жалпы ауданы 315,4 мың шаршы метрге жеткен. Яғни 172 көпқабатты үй салынған. Қазіргі таңда қалада сатып алу құқығынсыз жалға берілетін 10 үйдің құрылысы жүргізілуде.
Жылдам ақпарат алу үшін Facebook, Instagram желілері мен Telegram каналымызға жазылыңыз!