Соңғы жылдары қалада тұрғын үй құрылысы қарқынды жүруде. Тұрғындарды баспанамен қамтуда жыл сайын бірнеше көпқабатты үйлердің іргесі қаланып, ел игілігіне берілуде. Бұл бағыттағы жұмыс күні бүгінге дейін жалғасын табуда.
Қала аумағы жылдан-жылға кеңейіп келеді. Мұны түрлі құрылыс нысандарының бой көтеруінен-ақ байқауға болады. Әсіресе сол жағалаудағы құрылыс жұмысы қызу жүруде.
Биыл өңірде «Қуатты өңірлер – ел дамуының драйвері» ұлттық жобасы аясында барлық қаржыландырудың есебінен 692 300 шаршы метр тұрғын үй пайдалануға беріледі деп жоспарлануда. Ал соңғы алты айда 318 мың шаршы метр болатын тұрғын үйдің құрылысы аяқталып, тұрғындар қолданысына берілген.
Жыл сайын баспаналы болатын тұрғындардың қатары көбейгенімен, тұрғын үй құрылысы тоқтаған жоқ. Қазіргі таңда аймақта 27 көпқабатты үйдің құрылысы жүргізілуде. Оның тоғызы аудандарда бой көтерсе, қалған 17 үй қалалықтар игілігіне салынуда.
Шаһардың сол жағалауында қазір 16 тұрғын үйдің құрылысы қарқынды жүріп жатыр. Оның ішінде алты тұрғын үй жеті қабатты болса, қалғаны 5 қабатты үйлер. Бір ерекшелігі, бұл тұрғын үйлердің барлығы заманауи бағытта және жаңа технологиялардың көмегімен салынуда. Құрылысы жүріп жатқан 7 қабатты тұрғын үй – 84 пәтерлі болса, 5 қабатты үйлерде – 470 пәтер қамтылмақ.
Тұрғын үйлердің құрылысы келер жылы аяқталуы тиіс. Бұйыртса, жаңа жыл қарсаңында өз баспанасының кілтін алатын тұрғындар саны тағы еселене түседі деген сөз. Бұдан бөлек, республикалық бюджеттен мың пәтер әлеуметтік осал топтағы азаматтарға сатып алу құқығынсыз берілетін болады. Бұл да өз кезегінде аталған санаттағы азаматтарды баспанамен қамтамасыз етудегі бірден-бір қолдау болмақ.
Қалада салынып жатқан тұрғын үй құрылысындағы басты ерекшелік – 7 қабатты тұрғын үйдің бой көтеруі болып отыр. Бұл аймақ бойынша алғаш рет жүзеге асырылып отырған жоба. Сондықтан жаңа жоба құрылысы мамандар тарапынан егжей-тегжей тексеріліп, 7 рет өлшеніп кесілген шешім. Сәулетіне күн санап сән кіре бастаған облыс орталығының ажарын айшықтай түсетін жобаға республика бюджетінен 1 млрд 604 млн теңге қаражат бөлінген. Қазіргі таңда 7 қабатты бірінші үйге «Аман құрылыс» ЖШС мердігер мекемесі құрылыс жұмыстарын жүргізуде. Ақпан айында іргетасы қаланған нысанның жалпы ауданы 3,4 гектарды құрайды.
Бұдан бөлек 5 үйдің құрылысын «Орион ЛТД» ЖШС, «Риголит» ЖШС, «Промстройсервис Е» ЖШС, «Абу-Сер» ЖШС мердігер мекемесі жүргізеді. Жоспар бойынша 7 қабатты зәулім үйлер келер жылдың желтоқсан айында пайдалануға беріледі деп күтілуде.
Бүгінде инженерлік желілерінің жобалық-сметалық құжаттамасына сараптаманың оң қорытындысы берілген 7 қабатты тұрғын үйде үлкен қаладағыдай ыстық, салқын суы орталықтандырылған, тұрғындардың аулада еркін жүріп-тұруына, жайлы өмір сүруіне барынша жағдай жасалады деп жоспарланған. Ол үшін инженерлік желілерін жүргізуге 1395,3 млн теңге қаражат керек. Оның ішінде ауызсу және кәріз желісіне 104,5 млн теңге, электр желісіне – 377,6 млн теңге, жылу жүйесіне – 518,8 млн теңге, газ жүйесіне – 55,7 млн теңге және телефон мен абаттандыруға – 338,7 млн теңге қаржыға бюджеттік өтінім ұсынылған.
Тұрғын үй 7 қабатты болғандықтан әрі аймақ сейсмикалық аумаққа енгендіктен жоба құрылысының қауіпсіздігі де ескерілген. Құрылыс аяқталған соң тұрғын үй ипотека арқылы берілетін болады.
Жалпы сол жағалау аумағы ерекше үлгіде дами түспек. Әу баста, шығыс стилінде салынуы тиіс жаңа шағын аудан зәулім-зәулім ғимараттарымен көз тартатын болады. Мұнда пайдалануға берілген 74 тұрғын үй мен жеке мектеп, балабақша, жастар орталығы, «Болашақ» университеті сынды әлеуметтік нысандар бой көтерген.
Ал алдағы уақытта облыстық қан орталығы, көпбейінді аурухана, физика-математика мектебі де сол жағалау тұрғындарының игілігіне беріледі. Қазіргі таңда аталған денсаулық, білім ғимараттарының іргесі қаланды.
Сол жағалаудың көркін ашып, ажары өзіне тартар әсем ғимараттар салу мұнымен тоқтамақ емес. Шағын ауданға қоныс аударушылар саны күннен-күнге артып келеді. Сондықтан мұнда тұрғын үйге деген сұраныс артпаса, кемімейді. Себебі тиісті сала мамандары бұл маңнан алдағы уақытта 9 қабатты тұрғын үйдің де құрылысы жүретінін айтуда. Одан бөлек халық сұранысына сай түрлі нысандар салынады деп жоспарлануда.
Бұған дейін облыс орталығын 5 қабатты тұрғын үйлер қамтыған еді. Осы орайда көпшілік 5 қабаттан жоғары зәулім үйлердің салынбайтынын жиі айтатын. Сәтін салса, көп ұзамай 7 қабатты тұрғын үйдің де кілті тұрғындарға табысталып, баспана тойын тойлар күн келеді. Бұл да халық сұранысына құлақ асқан биліктің ел игілігі жолындағы қызметі.
А.СЕЙІЛ
Жылдам ақпарат алу үшін Facebook, Instagram желілері мен Telegram каналымызға жазылыңыз!