Қала әкімі Нұрлыбек Нәлібаев пен ҚР Сыбайлас жемқорлыққа қарсы іс-қимыл агенттігінің Қызылорда облысы бойынша департаментінің басшысы Ардақ Ерсейітов қалаға қарасты кент және ауылдық округтердегі «Сервистік әкімдіктің» жұмысымен танысты.
Осы мақсатта халық пен билік арасындағы ашықтықты, жариялылықты қамтамасыз ету мақсатында Тасбөгет кенті әкімдігі аппараты 2 жыл көлемінде «OPEN SPACE» форматында жұмыс істеп келеді. Ал биылдан бастап қызмет алушыларға, оның ішінде мүмкіндігі шектеулі жандар үшін қажетті жағдайлардың барлығы қарастырылған «Сервистік әкімдік» қағидаты бойынша халыққа қолжетімді қызмет көрсетуді бастады. Биыл оңтайландырылған сервис арқылы 2 мыңнан аса кент тұрғыны мемлекеттік қызмет түрін пайдаланған.
Тұрғындар «Сервистік әкімдік» арқылы жерге қатысты кез келген мәселесін шешіп, әлеуметтік сала бойынша сауалдарын жолдады. Сонымен қатар «Сервистік қызметке» «Нәтижелі жұмыспен қамту және жаппай кәсіпкерлікті дамытудың» 2017-2021 жылдарға арналған «Еңбек» мемлекеттік бағдарламасы бойынша бағыт-бағдар беру жұмыстары да кіреді. «Сервистік әкімдік» аясында ауыл шаруашылығы бойынша жеке және заңды тұлғалардың өтініштеріне сәйкес тиісті жұмыстар да атқарылады.
Ақсуат ауылының тұрғыны Сейітқасым Тәуірбаев «Сервистік әкімдік» қызметінің енгізілгеніне ризашылығын жеткізді. Ол жеке куәлігін ауыстыру үшін әкімдіктің сервистік қызметіне жүгінген.
– Қызылорда қаласы еліміз бойынша бірінші болып, қалаға қарасты кент және ауылдық округтерде «Сервистік әкімдік» қызметін жүзеге асыруда. Жаңа форматқа көшу тұрғындар үшін барынша ашық және қолайлы болып отыр. Бұл өз кезегінде жұмыс тиімділігін арттырып, тұрғындардың бір орыннан қызмет алуына мүмкіндік береді, – деді қала басшысы.
Жылдам ақпарат алу үшін Facebook, Instagram желілері мен Telegram каналымызға жазылыңыз!