Қас қағым сәтте жаз келіп жетті. Жаз мезгілі – балалардың асыға күтетін мерейлі маусымы. Жаз маусымы басталысымен оқушы қауымның арманына арқау болатын демалыс орындары да есіктерін айқара ашады. Жаз болса мәз болатын балалар үш ай бойы не істейді? Сол баяғы телефон мен компьютерге жіпсіз байланып отырмау үшін не істеу керек?
Біз өз кезегінде педагог-психолог Гүлназ Пірмантаеваны әңгімеге тартқан едік…
Психолог бала үшін ең жақсы демалыс ата-анамен бірге тыныққан уақыт екенін алға тартты.
Балалардың ата-анамен бірге уақыт өткізуі бала үшін де, ата-ана үшін де пайдалы. Себебі бала ата-ана жанында өзін еркін сезінеді. Міне, осындай жан мен тәннің бірге демалу кезеңінде жанындағы жақын жандар баланың сол сәттегі сезімі мен қуанышына ортақ болып, демалысы және ойындары жайлы пікірлері мен ойларына бірлесе отырып оң көзқарасын көрсетіп қолдау білдірсе, бұл бала үшін ең керемет психикалық және физикалық демалыс болады. Демалыс орны мен уақытын белгілеуде, ойын түрін таңдауда баланың ой-пікірін тыңдау да аса маңызды, – дейді Гүлназ Өмірсерікқызы.
Маман ата-ана баламен бірлесіп жазғы демалыс уақытына жоспар құрып, күнделікке жоспарын толық жазып шығуын ұйымдастыру қажет деген де пікір айтты.
Адамның түпсанасы өз қолымен жазылған дүниені өзіне тапсырма есебінде қабылдайды. Құрылған жоспар әртүрлі жағдаятқа байланысты толығымен орындалмауы да мүмкін. Ол үшін аса қорқудың қажеті жоқ. Негізгісі, баланың ойыңда аталған жазғы демалыс уақыты үшін жауакершілік тұрады. Сонымен қатар бұл жоспарда баланың ұялы телефон, компьютер, планшеттерде отыратын арнайы уақыты кесте бойынша көрсетіледі. Мінекей, түпсана сол белгіленген уақытқа дейін интернет әлеміне отыра алмайтыны жайлы ақпаратты балаға күнделіктегі жоспар бойынша дыбыс арқылы қалыптастыруға көмек береді.
Психолог бала мен ата-ананың ұзақ мерзім бір-бірінен алыста болуы бала тәрбиесіне кері әсерін беруі мүмкін деген көзқарастағы ата-аналарға да кеңесін айтты.
– Маман ретінде пікір білдіретін болсам, әрине, шектен тыс ұзақ мерзім ата-анасынан алыста болуы ең бірінші тұрғыда баланың психолосоматикасына кері әсерін береді. Себебі бала жас, өзінің ата-анасына сағыныш сезімін жеткізуге батылы жетпеуі немесе қорқуы мүмкін. Балаларда бала өміріндегі шешімдерді үлкендер ғана қабылдауы тиіс деген ұғым да болады.
Мінекей, осы ұғыммен бала өзіне ұнамайтын жағдаятты амалсыз қабылдайтын сәт те де кездеседі.
Сондықтан баланың ата-анасынан жырақта болу уақытына шекті мөлшер болуы керек деп санаймын, – дейді педагог-психолог.
Венера НҰРҒАЛИ,
Қорқыт ата атындағы университетінің
1-курс студенті
Жылдам ақпарат алу үшін Facebook, Instagram желілері мен Telegram каналымызға жазылыңыз!