«Сыр – Алаштың анасы». Сырдың жағасында орналасқан қаланың бүгінде күн санап құлпырып, көз алдымызда өркендеп, өсіп келе жатқаны қуантады.
Аймақта атқарылған айшықты істің қатарында тұрғын үй құрылысын атап айтуға болады. Соңғы жылдары өңірде тұрғын үй салу жанданып, жыл сайын айтулы күндерде пәтер кілтін табыстау дәстүрге айналды. Мұндай үрдістен биыл да қалыс қалғанымыз жоқ.
Балаларды қорғау күніне орай облыс әкімі Нұрлыбек Нәлібаев «Балалар жылы» аясында көпбалалы отбасыларға Жаппасбай батыр көшесінде орналасқан 50 пәтерлік жаңа үйдің кілтін табыстады.
– Мемлекет басшысы Қасым-Жомарт Тоқаев халықты тұрғын үймен қамтамасыз ету – мемлекеттің әлеуметтік саясатының басым бағыты екенін атап өткені белгілі. Соған сай өңірімізде тұрғын үй құрылысына басымдық беріліп, баспана мәселесін шешу батыл қадамның біріне айналды. 1 – маусым Халықаралық балаларды қорғау күніне орай Қызылордада жаңа тұрғын үйді пайдалануға беріп, көпбалалы отбасылардың қуанышына ортақтасып отырмыз. Балаларымыз жаңа үйге шаттана кіріп, ішін бақытқа толтырсын деп тілеймін. Қоныс тойларыңыз құтты болсын, – деді облыс әкімі.
Мереке қарсаңында тамаша тартуға ие болған көпбалалы отбасы Сейтжаппаровтар әулетіне аймақ басшысы арнайы барып, жаңа қонысқа бақ-береке тіледі.
Айта кету керек, Сыр өңірінде 30 жыл ішінде 8 млн шаршы метрге жуық тұрғын үй пайдалануға берілді. Биылдың өзінде «Нұрлы жер» мемлекеттік бағдарламасы аясында ауданы 95 мың шаршы метр, 1294 пәтерді құрайтын 31 тұрғын үйдің құрылысы жүргізілуде. Жыл соңына дейін 1244 пәтерді құрайтын 30 тұрғын үйді пайдалануға беру жоспарланып отыр.
Нұрайым МЫРҚЫ,
Қорқыт ата атындағы Қызылорда университетінің студенті
Жылдам ақпарат алу үшін Facebook, Instagram желілері мен Telegram каналымызға жазылыңыз!