Қаламызда «Қазақстанның үздік тауары – 2022» өңірлік көрме байқауы өткен болатын. Байқауға аймақ кәсіпкерлерінің түрлі саласынан 60-астам тауар өндіруші қатысты. Байқаудың кәсіпкерлердің дамуы үшін көп көмегі бар. Себебі көрмеде өздерінің тауарларын көрсету арқылы оны дамытуға мемлекеттен көмек алуға мүмкіндік туады. Яғни өз жұмысын бастап жатқан соның ішінде өзіміздің өнімді дамытуға қазіргі уақытта кедергі жоқ.
Көрмеде отандық өнімді өндіріп, кәсіпкерлік саласының дамуына үлес қосқан және өз қолтаңбасын қалыптастырып үлгерген кәсіп иелері әртүрлі аталым бойынша марапатталды. Мәселен, «Халық тұтынатын үздік тауарлар» аталымында Айман Сүйінтаева ие болды. «Aiman Abdi» брендімен өзінің қолтаңбасы, үлгісі арқылы жұмысын жандандырған кәсіпкердің ұлттық киімдері қазіргі уақытта республика ішінде сұранысқа ие. Жылына 450 дана өнім шығаруда. 5 адамды жұмыспен отыр. Дизайнерлік үлгіні қазақи нақыштағы балаларға арналған киім үлгілерін жасаудан бастаған. Біз «Aiman Abdi» дүкеніне барып, ұлттық киімдердің үлгілерін көруді жөн санадық. Дүкенде көздің жауын алатын ұлттық киімдер көп екен. Ұлттық киімдер үйлесімін тауып ерекше стильде тігілген. Тұсау кесерге арналған киімнен бастап, отбасылық үлгідегі киімдерге дейін бар. Яғни сіз той жасап, отбасыңыз бірдей ұлттық киімді кигенін қаласаңыз осы дүкенге баруға әбден болады.
Айман «есеп және аудит» мамандығы бойынша Қорқыт ата атындағы Қызылорда университетін бітірген. Мамандығы басқа болса да өнерге жақын болды. Ұлттық киімдердің үлгісін тіге бастады. Сол арқылы өзінің қолтаңбасын қалыптастыруды мақсат етті. Пандемия кезінде онлайн уақытты тиімді пайдаланып, дизайнерлік оқу курстарында білімін шыңдады. 2020 жылы алғаш рет «Дүние кілті сұлулықта» іскер әйелдер бас косу кезінде дефиле көрсетіп, ұлттық қамзолдарын жұртшылыққа паш еткен. Сол уақыттан бері көптеген сән көрсетіліміне қатысып, қазақтың ұлттық киімдерін халыққа дәріптеуде. Бүгінде арманы орындалып, жетістікке жетсе ол – өзінің таланты мен шынайы еңбегінің нәтижесі.
– 2019 жылы ең алғаш рет 3 қамзолдың үлгісін жасап жұмысымды бастадым. Киім үлгісін сызуды жаныма жақын тұттым. Дегенмен өзіміздің ұлттық өнерге үлес қосу үшін қазақы нақышта үлгілер сызуды жөн көрдім. Дизайнерлік киімге тапсырыс толастаған емес. Әсіресе инстаграм желісі арқылы еліміздің басқа қалаларынан тапсырыс беретіндер бар. Қазір отбасылық киімдерге сұраныс көп. Үйде отырып, киім үлгілерін жасаймын. Тігіншілер тіккеннен кейін моншақтарын өзім тігемін. Өз қолтаңбам, ерекшелігім болғанын қалаймын. Басқа елге сыйлыққа алатын мекемелер аз емес. Яғни қазақтың мәдениетіне қосып жатқан үлесіміздің бір бөлігі деп білемін. Жақында мемлекеттен төменгі пайызда несие алу үшін өтініш бердім. Егер кәсібімді кеңейтуге мүмкіндік болса, ателье ашуды жоспарлап отырмын, – дейді Айман ағынан жарылып.
Айманға идея мен шабыт тосыннан келеді екен. Киімдердің маталары да ерекше таңдаумен әкелінеді. Жіптерін Алматыдан алады. Бағалы маталар мен тың идеяның қосылуынан қайталанбас, айрықша киімдер тігіледі.
– Дизайнерлік киімдердің ерекшелігі – көшірме болмауы тиіс. Жан-жақты ізденістің, толыққанды идеялардың жемісі ретінде жаңа туынды шығады. Біреудің идеясын қайталау – қателік. Әр адам өз дизайндық шеберлігімен, өз стиль, өз ерекшелігімен танылуы керек. Сонда ғана өз қолынан шыққан өнерімен мақтана алады, – дейді ол.
Aiman Abdi Qazaqbrand жобасының ең басты ұстанымы – қазақ ұлттық киімдерін дәріптеу.
– Қазақ – әлемдегі ең ғажап ұлт. Қазақты әлем халқына ғажап ұлт екенін танытып тұрған ол – біздің ұлттық құндылықтарымыз, киімдеріміз. «Ең әдемі киім – ұлтыңның киімі» деген ұлағатты сөз бар. Сол қағида бойынша қазіргі заман талабына сай өз жұртымызды қазақи нақышта киіндіріп, бала кезден өз ұлтының киіміне деген сүйіспеншілігін нығайту – Aiman Abdi Qazaqbrandтің ең басты миссияның бірі. Ұлттық киімдер әр адамның ажарын ашып, сәнін кіргізеді деп білемін. Өзім де көбіне қазақы нақышта киінгенді ұнатамын, – дейді кейіпкеріміз.
Адал еңбек, теккен тер ақталмауы мүмкін емес. Айманның жұмысы да үлкен ортада бағаланып жүр. Тапсырыс та күннен-күнге көбеюде. «Үздік тауарлар – 2022» көрме байқауына номинация алып, республикаға жолдама алуы да үлкен жеңіс. Өз қолынан шыққан туындылары қошемет пен марапатқа бөленіп келеді. Мұндай қуаныштар дизайнердің шабытына шабыт қосады. Айман төрт баланың анасы. Жолдасы оның кәсібінің дамуына қолдау көрсетіп, әркез демеушілік жасап келеді.
Айтолқын АЙТЖАНОВА
Жылдам ақпарат алу үшін Facebook, Instagram желілері мен Telegram каналымызға жазылыңыз!