Көзін тапқанға кәсіп көп. «Кәсіп ашып, жұмыс істеймін дейтіндерге» мүмкіндік те жоқ емес. Соның нәтижесінде өзіміздің өнімді шығаратын кәсіп иелері көбейіп, өзіміздің аймақтан шыққан өнімдерге де сұраныс арта түсуде. Атап айтсақ, қаламызда Ресейдің сапалы есіктерінен кем емес сыртқы және ішкі есіктер шығарылуда. Кәсіпкер Дәулет Пірімжанов өндіріс цехын өткен жылы іске қосқан.
– Кәсіпті 1992 жылы бастадым. Ең әуелі есік саудасымен айналыстым. Оған да 20 жылдай уақыт болды. Украина, Беларусь, Қытай, Ресей елдерінен тасымалдайтынбыз. Осы мемлекеттердің біраз зауытында болдым. Өткен жылғы пандемия сауда саласына, тасымалға кері әсер етті. Өзімізге де есік жасайтын үлкен цех керек екенін ұқтым. Сондықтан да осы кәсіпті үйрену үшін Мәскеуде, Қытайдың Гуанжоу қаласында болдым.
Есік жасап, сатып жатқанымызға екі жылдан аса уақыт болды. Өзіміздің өнімді шығаруды мақсат еттім. Алға қойған мақсатымның нәтижесінде есіктерді шығаруды қолға алдым. Ойымдағыдай сапалы есіктерге сұраныс артты. Алдағы уақытта кәсібімнің аумағын ұлғайтып, өнім түрін көбейткім келеді. Осы мақсатта мемлекет тарапынан көмек сұрадым. Жақында қала әкімі келіп, жұмысымды көрді. Ісіміздің алға басуы үшін мемлекет тарапынан көмек болатынын айтты, – дейді кәсіпкер.
Бүгінде кәсіпкер 10 адамды тұрақты жұмыспен қамтып отыр. Күніне 20 есік шығарылады. Заманауи құрылғылармен жабдықталған цех өнімі сапалы, бағасы да қолжетімді.
– Үйдің ішкі есіктеріне қажет негізгі шикізат – мдф Ресейден, ал сыртқы есікке темір Қарағандыдан, темір бояуларды Түркиядан, Санкт-Петербургтен келеді. Алдағы уақытта өндіріс екі бағытта дамиды. Есік жасаудан бөлек, басқа да жиһаздар жасау жағын қарастыру жоспарда бар. Біздің қаламызда бұл бағытта жұмыс істейтін мамандар жоқтың қасы. Сондықтан ресейлік мамандардан үйренуге тура келеді. Цехта өндіріске қажетті барлық құрал-сайман, станоктар бар. Негізі бұл жұмысты сапалы жасауға сабыр мен төзім керек. Мықты дүние шығару үшін ағашты да дұрыс таңдау қажет. Ағашы мықты болмаса жарылып немесе ішіне су сіңіп кетпеуі керек. Сапалы дүние болса ғана тұтынушы көбейеді, – дейді Дәулет Пірімжанов.
Есіктің қиюын келістіріп, әдемі дүние етіп шығару тек шын шебердің қолынан келеді. «Қимылдағанның қыр асатынын» жақсы білетін Дәулет кәсіптің осы түрін қолға алып, жетістікке жететінін түсінді.
Айтолқын АЙТЖАНОВА
Жылдам ақпарат алу үшін Facebook, Instagram желілері мен Telegram каналымызға жазылыңыз!