Енді тұрғын үй коммуналдық шаруашылығы мәселесі бойынша «Пәтер иелері кооперативі» қызметін «Меншік иелері бірлестігі» атқаратын болады. Бұл туралы қала әкімдігінде өткен брифингте қалалық тұрғын үй инспекциясы бөлімінің басшысы Абзал Рысбек мәлім етті.
Президент 30 маусымда электр энергетикасы, жер қойнауын пайдалану, жергілікті мемлекеттік басқару және ТКШ мәселесі бойынша заңнамалық актілерге өзгерістер мен толықтырулар енгізілетін заңға қол қойған. Соның негізінде ортақ меншікті күтіп ұстауға тұрғындар жауапты болады.
– Бұған дейін қала аумағындағы көпқабатты үйлердің күтімі «Пәтер иелері кооперативінің» құзырында еді. Олардың жұмысына тұрғындар тарапынан шағымдар көп келетін. Жаңа заңға сәйкес енді бұл жауапкершілік меншік иелерінің өздеріне жүктеледі. Қазіргі таңда кондоминиум объектілерін басқарудың жаңа нысанын құру бойынша шаралар қолға алынды, – деді бөлім басшысы.
Бүгінде қала бойынша 575 көппәтерлі үйдің 568-і ЖС (жай серіктестік), 7-нен МИБ-ке (меншік иелері бірлестігі) ауысқан. Ендігі 568 көппәтерлі үйді МИБ-ке ауыстыру бойынша жұмыс жүргізілуде. Меншік иелері бірлестігіне екінші деңгейлі банк, «Қазпошта» АҚ арқылы есепшот ашылады. Ондағы қаражатты тұрғындар пәтер мәселесі бойынша қажеттілікке жаратады. «Тұрғын үй қатынастары» заңының 10-3 бабына сәйкес кондоминиум нысандарын басқаруға және ортақ мүліктерді күтіп ұстауға жұмсалатын шығынның ең төменгі мөлшері 1 шаршы метрге – 23 теңге болып бекітілді. Қазір МИБ-ке ауысқан 7 көппәтерлі тұрғын үйдің 2-еуі есепшот ашып, жаңа жүйеге көшкен. Алдағы уақытта қалған тұрғын үйлерді осы жүйеге көшіру көзделуде. Бұл шара келер жылдың 1 шілдесіне дейін аяқталуы тиіс.
Ақмешіт-ақпарат
Жылдам ақпарат алу үшін Facebook, Instagram желілері мен Telegram каналымызға жазылыңыз!