Сәрсенбі күні қалалық мәслихаттың мәжіліс залында сессия өтті. Жиынға қала әкімі Ғанибек Қазантаев, мәслихат депутаттары, салалық бөлім басшылары, кент және ауылдық округ әкімдері қатысты.
Сессияда қала әкімі аппаратының басшысы Ж.Сейілов, экономика және бюджеттік жоспарлау бөлімінің басшысы Г.Баймаханова, сондай-ақ кент және ауыл әкімдері баяндама жасады.
Сессияны мәслихат депутаты Ж.Нұрымбетов жүргізді.
Жиында 2020 жылғы 14 желтоқсандағы №404-72/1 шешіміне өзгерістер енгізу, «2020 жылға арналған қала, кент және ауылдық округ бюджеттерінің атқарылуы жөніндегі есеп», қала әкімдігінің дербес құрамын келісу, қалалық жер комиссиясының құрамын және комиссия ережесін бекіту туралы мәселелері талқыланып, тиісті шешімдер қабылданды.
Сессияда қала әкімі Ғ.Қазантаев сөз алып, депутаттарды бірлесе жұмыс жасауға шақырды.
Сессия шешіміне сәйкес қала бюджетін нақтылау барысында Чернобыль атом электр станциясында апаттың зардабын жоюға қатысқан азаматтарға біржолғы әлеуметтік көмек көрсету мәселесі талқынанып, оған қаржы бағытталды. Сондай-ақ қаладағы тозығы жеткен электр желілері де айтылды. Әл-Фараби, Наурыз, СПМК-70/2, СПМК-70/4, Белкөл кенті, Бірқазан елді мекені, Титов мөлтек аудандарын электр желілерімен жабдықтау жобасы да сөз етілді. Арай мөлтек аумағы, Қараманов көшесі, Алты алаш көшесі, Әубәкіров көшесі, Есетов және Тәуке хан көшелеріндегі ауыз су жүйесінің құрылысына, Тасбөгет кентідегі 15 көшеге малтатасты жолдар құрылысына, Тасбөгет кентінде дене шынықтыру-сауықтыру кешенінің құрылысына, СПМК-70, 70/3, 70/4 тұрғын аудандарында көп қабатты тұрғын үй құрылыстарын жүргізу жұмыстарына қаржы бағытталды.
Жылдам ақпарат алу үшін Facebook, Instagram желілері мен Telegram каналымызға жазылыңыз!