Кеше Асқар Тоқмағамбетов атындағы мәдениет үйінде белгілі ақын Әскербек Рахымбекұлының 80 жасқа толуына орай ақынды еске алу кеші өтті.
Рухани кешке Сыр өңірінің зиялы қауым өкілдері, ақынның отбасы, құлын-тайдай тебісіп, бірге өскен достары, өлеңге таласы бар жас буын қатысты. Әскербек Рахымбекұлы есімі қазақ поэзиясында ғана емес, қазақ журналистикасында да танымал тұлға. Еңбек жолын аудандық «Сырдария» газетінен бастап, облыстық «Сыр бойы» газетінде ұзақ жыл еңбек еткен қаламгер газеттің мехнатты жұмысын атқара жүріп, өлең жазуды да ұмытпады, көз тірісінде 10-нан астам жыр жинағы жарыққа шықты.
Ақынды еске алу кешінде облыстық мәдениет және спорт басқармасының басшысы Руслан Рүстемов сөз алып, сырға толы ақын шығармашылығының өзіндік ерекшелігіне тоқталды.
– Сыр бойы таланттарға кенде емес. Талант – Тәңірден. Қазақ поэзиясы деген алып көштің ішіндегі таланттар шоғырында ақын Әскербек Рахымбекұлының өзіндік әлемі бар. Ақын шығармашылығы туралы белгілі ғалым, профессор Бағдат Кәрбозұлы кезінде «Әскербектің әсемдік әлемі» атты монография жазды. Ғалым талантты ақынның қазақ поэзиясындағы өзіндік қолтаңбасына талдау жасаған еді. Расында, ақын Әскербек Рахымбекұлы қазақ поэзиясына өзінше жаңалық, ерекше түр енгізді. Ақынның өлеңінде төрт шумақ болса, сол төрт тағаны да түгел ұйқасып жатады. Уақытында ақын-жазушылар үшін мәртебелі саналған «Жалын» жабық бәйгесінде екі мәрте бас бәйгені жеңіп алғанының өзі оның ақындық талантын айтқызбай-ақ байқатады, – деді ол.
Ал ақын Махмұтбай Әміреұлы ақын досы өмірден озғалы жалғызсырап жүргенін жасырмады.Әңгімесі таусылмайтын сырлас досты сағынғанын жеткізді.
– Әсекең екеуміз 60 жылдай бірге жүрдік. Әрдайым әңгімеміз жарасып, ойымыз бір жерден шығып жататын. Ол сексенге жетпеді. Алайда оның артында мәңгілік жырлары қалды, – дейді сырлас досы.
Қазақстан Жазушылар одағының облыстық филиал төрағасы Қаржыға Есімсейітова ақын ағаның өзіне жыр-бата бергенін еске алып, оның нәзік иірімдерге толы жырларының жүректен-жүрекке жететінін атап айтты.
Ақынның адами болмысын, қарапайымдылығы мен кішіпейілдігін сыйласып жүріп, ізгі қасиетіне тәнті болғанын досы, белгілі ғалым Қазыбай Құдайбергенов тебірене еске алды. Ақынның бары да, бақыты да өлеңі болғанын, оның бойындағы асыл қасиет өлеңдерінен де сезіліп тұратынын жеткізді. Талант иесінің қызығы мен шыжығы мол студенттік жылдарында бірге оқып, бірге пәтер жалдап, бір үзім нанды бөліп жеген жан досы Зинабдин Шермағамбет ақынның өз өлеңдерін жатқа оқитын қасиетін, досқа адал, ортада сыйлы, қашанда сырбаз, мәдениетті қалпын жоғалтпағанын, тіпті мақтау-марапаттан биік болған асыл қасиетін үлгі етті.
«Ол менің өмір мектебіндегі ұстазым болды» деген ақын Дүйсенбек Аяшұлы қолына диплом алған, сары ауыз балапан шағында облыстық «Сыр бойы» газетіне жұмысқа шақырғанын, оның ағалық қамқорлығы үшін шәкірті ретінде қарыздар екенін тебірене жеткізді. Сырбаз ағадан жас буынның бойына сіңірген үлгілі ісі аз болмапты. Айналасын сөзбен емес, ісімен тәрбиелеген ұстаз бола білгені де еске алу кешінде атап айтылды. Оның қарапайымдылығы, сабырлығы, адамгершілігі мен ізгілігінің сәулесі айналасын самаладай жарқырата түскені ақынның еске алу кешіне жылулық сыйлағандай әсер берді.
Талантты ақын Шәкизада Әбдікәрімов оның қара өлеңге өзіндік өрнек салғанын атап айтты. Еске алу кешінде бірнеше мәрте айтылған оның ізгі қасиеттері мен сыпайылығы, ешкімді ренжітіп алмайын деген сырбаз мінезі нәзік қаламынан төгілген өлеңдерінде өшпенділік жоқ екенін, айтар назын тігісін жатқыза жеткізіп, адамзатқа ой салатын ойлы өлеңдерінің ешқашан өлмейтіні еске алу кеші тағы бір дәлелдей түсті.
…Бөлектеніп барамыз
бөрілердей,
Бөлек жүрсек бөркіміз көрінердей» – деген өлең жолдарының өзі-ақ талайды ойландырып тастайтыны белгілі.
Шәкизада Әбдікәрімов мысал еткен ақын Есенғали Раушановтың: «Табиғат тазару үшін жаңбыр керек, адамдар тазару үшін ақын керек» деген сөзі кешке жиналған көрерменді бей-жай қалдырмасы анық. Бұл кештен көпшілік ой түйіп, рухани демалып шықты.
Гүлмира ДІЛДӘБЕКОВА
Суретті түсірген Н.НҰРЖАУБАЙ
Жылдам ақпарат алу үшін Facebook, Instagram желілері мен Telegram каналымызға жазылыңыз!