Кітапхана – білімнің бастауы, тарихтың куәсі, руханияттың сарқылмас қайнар көзі. Ал, кітапханашылар – сол рухани әлемді реттеп, ұлт жадының шырағын сөндірмей келе жатқан жандар. 24 қазан – білімнің шамшырағына айналған осы бір маман иелерінің мерейлі мерекесі. Айтулы мерекеге орай бүгін Ә.Тәжібаев атындағы облыстық әмбебап ғылыми кітапханада салтанатты жиын өтті.
Мерекелік жиынға облыстық мәдениет, архивтер және құжаттама басқармасы басшысының міндетін атқарушы Қуаныш Жанұзақов, облыс кітапханашылары мен ардагер кітапханашылар қатысты. Іс-шара аясында аудан және қала кітапханаларының озық жобалары таныстырылып, кітапхана тарихына арналған көрме қойылды.
Сондай-ақ, шара соңында кітапхана саласының дамуына елеулі үлес қосқан үздік кітапхана қызметкерлері ҚР Мәдениет және ақпарат министрлігінің «Мәдениет саласының үздігі» төсбелгісімен, «Құрмет грамотасы» және «Алғыс хатымен» марапатталды.
– Кітапханашылар күні аясында ҚР Мәдениет және ақпарат министрлігінің «Мәдениет саласының үздігі» төсбелгісімен марапатталдым. Өте қуаныштымын. Кейінгі кездері қоғамда кітапханаға деген оң көзқарас, жаңа бетбұрыс қатты байқалады. Бұған біздің кітапханашы әріптестеріміздің де жасап жатқан ерен еңбегі әсер еткен шығар деген ойдамын. Дәл қазіргі таңда Ә.Тәжібаев атындағы облыстық әмбебап ғылыми кітапаханасының қорында кітап қоры 435 796 дананы құрайды. Қазір цифрлық даму дәуірі болғандықтан, «Кітапхана қорларын цифрландыру» жобасы аясында қор сақталымын қамтамасыз ету мақсатында жыл жасынан бері 634 кітап цифрлы форматқа көшірілді. Қазіргі таңда барлығы 9 116 дана кітап цифрланды,- деді Ә.Тәжібаев атындағы облыстық әмбебап ғылыми кітапханасының кітапханаларды дамыту бөлімінің меңгерушісі Гүлжахан Жүсіпова.
Қызылорда облысының Өңірлік коммуникациялар қызметі
Жылдам ақпарат алу үшін Facebook, Instagram желілері мен Telegram каналымызға жазылыңыз!