Жаңа Конституция жобасын түсіндіру мақсатында өңірлік коалиция өкілдері №1 арнаулы әлеуметтік қызметтер көрсету орталығының ұжымымен кездесу өткізді.
Жиынға қалалық коалиция жетекшісінің орынбасары Гүлшат Мұсаева, жергілікті коалиция мүшелері Алтын Есқараева, Бауыржан Төлеген, Раушан Ысқақова, Сәкен Алдашбаев және Абунасыр Алдабергенов қатысты.
Кездесу барысында Гүлшат Мұсаева Конституция жобасының негізгі бағыттарына тоқталып, құжаттың басты мақсаты – әділетті, ашық және азаматтардың пікірін ескеретін мемлекеттік жүйені қалыптастыру екенін атап өтті. Ол Ата Заңға енгізілетін өзгерістердің азаматтардың құқықтары мен бостандықтарын қорғауды күшейтуге, билік тармақтары арасындағы тепе-теңдікті сақтауға, сондай-ақ жергілікті өзін-өзі басқару жүйесінің тиімділігін арттыруға бағытталғанын түсіндірді. Сонымен қатар, конституциялық реформалар елдегі саяси жаңғыру үдерісінің маңызды кезеңі екенін атап өтті.
Коалиция мүшесі Раушан Ысқақова реформалардың стратегиялық маңыздылығына тоқталып, олардың елдің орнықты дамуына, әлеуметтік саясаттың жаңаруына және қоғамдық келісім мен бірліктің нығаюына ықпал ететіндігін жеткізді.
Кездесу еркін форматта өтті, қатысушылар Конституция жобасындағы нормалар туралы пікірлерін білдіріп, сұрақтарына жауап алды.
Жылдам ақпарат алу үшін Facebook, Instagram желілері мен Telegram каналымызға жазылыңыз!