Журналистер күніне орай әріптестер арасындағы әдемі әзілмен өрілген қуақы қалжыңдарды ұсынып отырмыз.
Алдыма келсе, бірден тізе бүгеді
Журналистер арасында қағытпа сөз, қалжың әңгімемен есте қалған айтқыштар жетерлік. Соның бірі – «Азаттықтың» меншікті тілшісі Ерқанат Сәрсенбайұлы мен облыс әкімдігінің фото-тілшісі Бағдат Есжанов.
Бағдат Есжанов бірде әлеуметтік желіге жазба жүктеп, «Әшейін фейсбукта ғой сыртымнан бірдеңе-сірдеңе деп отыратыны. Алдыма келсе осы ғой, бірден тізе бүгеді» – деп Ерқанат Сәрсенбайұлының тізе бүгіп отырған суретін жариялапты.
Ерқанат Сәрсенбайұлы суретті жазбаға пікір қалдырып: «Кедергі келтірмейін деп отырып ем, тізе бүкті депті ғой мақтаншақ. Келесі съемкада қасқайып алдыңа тұрып алармын, суретке түсіртпей» – депті қағыта жауап беріп.
Су іздеген сағаға барады
Бағдат Есжанов фейсбук әлеуметтік желісіне «Ерқанат мені тегтеп, балконға шықпай қапты депті. Содан Сырдарияны жағалап, Көкаралдан бір-ақ шықтым. Сырдарияны таппай тұрмын, сөйтсем Сырдария осы жерден бітеді екен ғой» деп парақшасына жазба қалдырыпты.
Мұны көрген Ерқанат:
– Су іздеген сағаға баратын сияқты еді. Соңына кетіпті ғой кері кетіп, –деп тапқырлықпен жауап қатқан.
Бекежаннан кем болып тұрған жоқсың
Ерқанат Сәрсенбайұлы парақшасына «Шіркін, Қыз Жібектің заманы қайтып келсе, сөзсіз Бекежан болар ем…» деп жазба жүктесе, Бағдат Есжанов:
– Қазірде Бекежаннан кем болып тұрған жоқсың, – деп пікір білдірген екен.
Гүлекең жазса, үшінші орын алатын едім
«Ақмешіт апталығы» газетінің бас редакторы Әзиз Батырбеков газеттің кезекті нөмірін жоспарлап жатып «осы айда сараптамалық мақаладан екі бірдей тілшіміз орын алды. Ақтілек бірінші орын, Аслан екінші орын. Ақтілек жазып жүр ғой енді. Аслан, осы саған мақаланы Гүлмира апайың жазып берген жоқ па?» – деді қалжыңдап.
Гүлмира Ділдабекова:
– Мен жазып берсем, бірінші орын алатын еді ғой, – деді редактордың сөзін іле-шала.
Аслан болса:
– Жо-жоқ, олай емес. Гүлекең жазып берсе, үшінші орын алатын едім, – деді өткен айда Гүлмира апайдың үшінші орын алғанын еске салып.
Айттым ғой, дұшпаным көп деп
Өңірлік коммуникациялар қызметі басшысының орынбасары Нұрлан Тәшім-Тегі әлемжеліге «айнадан Тәуекел Мүсілімді көретін жігітпен» деп бір кездері «Ақмешіт апталығы» газетінде тілші болған Жарасхан Қуанышбайұлымен түскен суретін жүктепті.
Жазба астына әріптестерінен түрлі пікірлер жазылыпты:
«Тәуекел айнадан Жарасты көріп жүр дейсің ғой», «Қойыңдар, Тәуекел ренжіп қалар», «Мына жазбадан кейін жарнамаға ұсыныс келіп тұр дейсің ғой, ещё шампуньнан», «Тәуекел мынаны естісе, атын өзгертіп тастайтын шығар?», – деген.
Жарасхан болса:
– Нұрлан, бекер салдың суретті. Айттым ғой, дұшпандарым көп деп. Көре алмайды бұлар, – деп барлығын бір жауаппен тойтарыпты.
Шалбарының қыры бар
Бір күні Қызылорда телеарнасынан журналист Елжас Әбділда әріптесіміз Жарасхан Қуанышбайұлының ағасын бағдарламаға түсіретін болып, «Сыр медиаға» келген. Содан Елжас келгендегі шаруасын айтып:
«Жарас, ағаңды бағдарламаға түсірсек пе дегенбіз. Ағаң жылы жүректі, облыстағы белсенді азаматтың бірі ғой. Тағы қандай қырлары бар?» – депті.
Жарас түзу сөйлеуші ме еді:
– Шалбарының қыры бар, – депті баяғы қалжыңбастығына салынып.
Коронавирус кімнен жұғады?
Әріптесіміз Айтолқын Айтжанованың да әңгіме арасында қойып қалып, күлдіретіні бар.
Бірде Айтолқынға «Сенің әзілің күшті, қатырып айтысың дедік».
Сонда Айтолқын:
– Кішкентай қызым да өзіме ұқсаған. Бір күні балабақшадан келген бойда:
– Анашым, осы коронавирус әкімдерден жұғады ма? – демесі бар ма.
– Оны кім айтты? – дедім.
– Балабақшада апайлар «әкім келе жатыр, бетперде киіңдер» дейді ғой осы, – деп бетіме қарап тұр. Қызымның байқағыштығына таң қалдым, – деді Айтолқын.
– Әйтпесе сенің қызың болар ма? – деп біз де күлдік.
Сіздің ұйқасыңыз үшін әкелдік
Осыдан бірнеше жыл бұрын Шымкентке ақындар арасында футболдан жарыс болып, Сырдан бір команда шығады. Бұл команданың құрамында республикалық «Халық» газетінің тілшісі Рыскелді Жахман да бар.
Сырттан келген қонақтармен танысып жатқан Есет Досалы деген ақын:
«Рыскелді, футболға дұрыс келді» деп әзілдесе керек. Мұны анадайдан естіп тұрған үш дүркін алтын домбыраның иегері, сырбойылықтарды бастап барған айтыскер Мұхтар Ниязов:
«Есет аға, осы баланы сіздің ұйқасыңыз үшін әкелдік» деп жиылған елді күлкіге қарық қылған екен.
Кезекші редактор оқиды
Осыдан бірнеше жыл бұрын облыстық «Ақмешіт жастары» газетінде кезекті нөмірге сапалы материалдар салынбапты. Бас-аяғы бір екі күнде даярланған мақалалар әлсіз болып шыққан көрінеді.
Содан әріптесіміз Ерасыл Шәрібек кабинетке келсе, тілші Айдана Жұмадинова ашуланып отыр екен. Айдана есіктен енді енген Ерасылға:
– Газеттің мына санында оқитын түк мақала жоқ. Әлсіз бәрі. Мына нөмірді кім оқысын? – депті.
Ерасыл ойланбастан қағыта сөйлеп:
– Кім оқығаны несі, кезекші редактор оқиды да, – деген екен.
Жылдам ақпарат алу үшін Facebook, Instagram желілері мен Telegram каналымызға жазылыңыз!