Аймақ мерейтойы қарсаңында ел игілігіне берілген тағы бір нысан – «Анаға тағзым» орталығы. Құны 1,5 млрд теңгені құраған заманауи үлгідегі орталықта жас отбасыларға, қыз-келіншектерге, балаларға ұлттық құндылықтарымыз дәріптеліп, әдет-ғұрып пен салт-дәстүрді жаңғыртуға мүмкіндік берілмек. Ғимарат ішінде қыз-келіншектерге арналған арнайы бөлмелер, тұрмысқа және қонақ күтуге баулу, жан-жақты психологиялық көмек беру кабинеттері жұмыс істейді. Бұдан басқа шығармашыл жандарға арналған әдебиет және поэзия, дизайн студиясы мен би орталығы және жас отбасыларға қызмет көрсету бөлмелері бар.
Орталықтың ашылуына қатысқан облыс әкімі Нұрлыбек Нәлібаев жиналған жұртшылықты жаңа нысанның ашылуымен құттықтады.
– Қадірлі жерлестер, ардақты аналар, құрметті қонақтар! Баршаңызды ең алдымен Қызылорда облысының құрылғанына 85 жыл толуымен шын жүректен құттықтаймын. Тамырын тереңге тартқан, сан ғасырлық тарихы бар шежірелі Сыр елі облыс болып құрылған осы жылдардың ішінде дамудың түрлі сатысынан өтіп, жаңару мен жаңғырудың жолына бет алды. Кейінгі жылдары өңірімізде туған жерімді түлетсем деген жаны жомарт, жүрегі мейірімге толы азаматтар көптеп шығуда. Жанашыр азаматтардың қолдауымен, демеушілігімен аймағымызда көптеген әсем ғимарат бой көтеруде. Бүгін облысымыздың 85 жылдық мерейлі мерекесі аясында «Анаға тағзым» орталығы ел игілігіне табысталады. Аналарымыздың құрметіне салынған «Анаға тағзым» орталығы аймақ жұртшылығына жомарттығымен танымал белгілі кәсіпкер Марат Дүйсенбаевтың демеушілігімен бой көтерді. «Анаға тағзым» орталығы – балауса бойжеткен, қыз баладан бастап ардақты асыл әжеге дейін бас қосатын талбесік тәрбие мектебі. Орталық арқылы ақылды да парасатты аналарымыз бен инабатты келіндеріміздің өнегелі ісінен, салмақты сөзінен тәжірибе жинаған жастарымыздың келешегі кемел болып, мықты отбасылар қатары көбейетіні сөзсіз. Барша Сыр жұртшылығы атынан туған жерінің жанашыр азаматы Марат Базарбайұлына шексіз алғысымызды, ризашылығымызды білдіреміз, – деді.
Орталықтың ашылу салтанаты шарасында облыс әкімі қаланың өсіп-өркендеп гүлденуіне үлес қосып, демеушілік жасап жүрген перзенті, «Парасат» орденінің иегері Марат Дүйсенбаевқа Құрмет грамотасын табыстады.
А.СЕЙІЛ
Жылдам ақпарат алу үшін Facebook, Instagram желілері мен Telegram каналымызға жазылыңыз!