Жақында Елордадан ақжолтай хабар жетті. Жерлесіміз әрі әріптесіміз, «Жаңақорған тынысы» газетінің тілшісі Әлібек Жарықбаевтың «АМАNAT» партиясы ұйымдастырған республикалық байқауда «Рәміздер – елдіктің нышаны» атты мақаласы үздік деп танылды. Мереке қарсаңында әріптесімізбен хабарласып аз-кем әңгімелескен едік.
– Әлібек, марапат құтты болсын! Жеңімпаз атанғаныңызды естігенде қандай әсерде болдыңыз?
– Үлкен рақмет! Әуелі Алла, сосын анамның ақ батасының арқасында келген көкжиек деп білемін. Бұл менің ғана емес, жалпы Сыр журналистерінің жеңісі. Шыны керек, мен бастапқыда сене алмадым. Осыған дейін байқауларда жүлдегерлер қатарынан көрініп жүргеніммен, бұл жеңіс мен үшін күтпеген жаңалық болды. Сәрсенбі күні түнгі уақытта Ринат Думанұлы ағамыз хабарласып, Нұр-Сұлтанға тез келу керегімді айтты. Ертесіне қайта қоңырау шалып, сен жеңімпазсың дегенде абдырап қалдым.
– Байқауға қандай тақырыпта, қай мақалаңызды ұсындыңыз?
– Негізі байқауға үш тақырып бойынша мақала берген едім. Жастар жөнінде, әлеуметтік мәселеге байланысты және ҚР Мемлекеттік Рәміздерінің 30 жылдығына байланысты мақалалар жібердім. Соның ішінде «Рәміздер – елдіктің нышаны» деген тақырыптағы мақалам үздік болды.
– Марапат табыстау салтанатына ұшаққа билет табылмай бара алмайтыңызды білгендегі ішкі сезіміңіз қандай болды?
– Бейсенбі күні Түркістаннан ұшаққа билет алып қойғанмын, бірақ жолдағы кедергілер бар, ұшақтың ұшуына 20 минут қалғанда барып, тіркеуге үлгермей қалдым. Содан еңсем түсіп ауылға қайттым, түнімен ертеңіне Қызылордадан, Шымкент, Түркістан, тіпті Алматыдан Елордаға ұшатын ұшаққа билет іздедім. Алла сәтін салмағанын түсіндім, сонда да іздей бердім. Амал жоқ, ұйымдастырушыларға хабарласып бара алмайтынымды айттым. Ринат ағамыз қоңырау шалып, жарайды онда дегенде, бәрі бітті деп ойладым. Бірақ, билет табылмай жатқанда өзімді қоярға жер таппадым.
– Бұл жеңіс сізге несімен құнды?
– Бұл жеңіс мен үшін журналистика саласындағы ең бір биік мінбер болды. Шығармашылығыма шабыт берді, мамандығымның қадір-қасиетін тереңірек ұқтыра түсті. «AMANAT»-тың аманатын арқаладық, енді ұлтқа қызмет етудің ұлы жолын жалғастыра береміз. Бұл жай ғана жеңіс емес, жауапкершілік жүгі деп түсінемін. Осы тұғырда тілекші болып жүрген жақын жандарға, «Жаңақорған тынысы» газеті редакциясының ұжымына, «Сыр Медиа» ұжымына, арнайы Қаныбек Әбдуов, Нұрлат Байгенже және баян Үсейінова ұстаздарыма мың алғыс.
– Алдағы жоспарларыңызбен бөлісе отырсаңыз?
– Жалпы өздеріңіз білетіндей бұл саланың бүгінгі ахуалы күрделі. Мәртебесі мен жалақысы жанымызға батады. Дегенмен, жүрек қалауы болған соң, жарты жолдан кетіп қалуға қимадым. Әйтпесе, тәуір ұсыныстар болды. Бірақ тіршілігім тілшілікпен байланысқаннан кейін асығыс шешім шығармауға тырыстым. Алла бұйыртса елдегі жаңа медианың жүгін арқалап, жарқын белестерге жетуге тырысамыз. Алда байқау көп, елдің атынан сынға түсіп көруге тырысамын.
– Мерекелік лебізіңіз…
– Қолына қалам ұстаған барша қаламгер қауымын, Сыр журналистерін, «Сыр медиа» ұжымын төл мерекемен шын жүректен құттықтаймын. Жеңісті күндер көп болсын!
– Әсерлі әңгімеңізге рақмет!
Сұхбаттасқан Т.БЕКМЫРЗАЕВ
Жылдам ақпарат алу үшін Facebook, Instagram желілері мен Telegram каналымызға жазылыңыз!