Ауыл – елдің алтын қазығы. Қазақы құндылықтарымыздың қайнар бұлағы. Әлеуметтің әлеуметтік ахуалының артуы ауылдарға тікелей байланысты. 2019 жылы қабылданған «Ауыл – ел бесігі» мемлекеттік бағдарламаның басты мақсаты – халық қажетін өтеу.
«Ауылдық жерлердің әлеуметтік ортасын жаңғыртуға да кірісуіміз қажет. Осыған байланысты арнайы «Ауыл – ел бесігі» бағдарламасын қабылдадық. Бұл арқылы қазақстандықтардың жергілікті жердегі еңбегіне қатысты идеологияны қолға алуымыз керек», – деген еді Елбасы Нұрсұлтан Назарбаев.
Осы ретте жол жөндеу, жарық шамдар орнату, бордюр қою секілді жұмыстар атқарылып келеді. Бағдарлама аясында бүгінге дейін облыс орталығында сан алуан жұмыстар атқарылды. Биылдың өзінде қалаға қарасты Талсуат пен Қосшыңырау ауылдық округтерінің әрқайсысында 5 көшеден жөнделді.
«Ауыл – ел бесігі» бағдарламасы аясында Қосшыңырау ауылдық округінде 5 көше жөнделді. Оның ішінде Абай ауылындағы №1, №5, «Қырман» көшесіне және Досан елді мекеніндегі №1, №9Б көшелері асфальтталды. Елді мекен тұрғындары бұған дән риза. Алдағы уақытта да осы бағыттағы істер ретімен жалғаспақ. Мұның барлығы ауыл халқының тұрмыстық әл-ауқатының артуына септігін тигізбек, – дейді Қосшыңырау ауылдық округі әкімі Сейдуали Әбдіқадыров.
Бағдарлама игілігін көрген тағы бір елді мекен – қала іргесінде орналасқан Талсуат ауылдық округі. Мұнда 2 мыңнан аса халық бар. Тұрғындардың басым бөлігі кәсіпкерлікпен айналысады. Өткен жылы өңірлерді дамыту бағдарламасы аясында 4 көшеге күрделі жөндеу жүргізілген. Оның екі көшесі «Жол картасы» мемлекеттік бағдарламасы негізінде іске асырылды. Қалған екеуі қала бюджетінен қаржыландырылған.
– Ауылдық округте 31 көше бар. Оның 7,8 шақырымы асфальтталып, 6,3 шақырымына қиыршық тас төселген, 4,2 шақырымы қара жолдар. 2021 жылы «Ауыл – ел бесігі» бағдарламасы аясында Талсуат ауылдық округіндегі 3,4 шақырым болатын Ақмешіт, Алматы, Орынбор, Арал, Атырау көшелеріне орташа жол жөндеу үшін 66236 мың теңге, қалалық бюджеттен 7359 мың теңге қаражат бөлінді. «Абу-Жүсіп» ЖШС Алматы және Арал көшелеріне, «РеалСтройСнаб»ЖШС Ақмешіт және Орынбор көшелеріне асфальт төсеп, арнайы комиссия тексеріп пайдалануға берілді. Ал Атырау көшесіне орташа жөндеу жұмысы басталып, жақын арада аяқталады деп жоспарлануда. Мұның барлығы ел өркендеуінің негізгі тетігі болып отыр. Салынған жолдар заманауи талапқа сай келеді, – дейді Талсуат ауылдық округі әкімдігінің бас маманы Айнагүл Жайдариева.
«Ауыл – ел бесігі» бағдарламасы басталғалы 3 жыл ішінде Сыр өңірінде 11 миллиард теңгеден асатын 173 инвестициялық жоба жүзеге асырылды. 2019 жылы 31 жоба арқылы 54 адам жұмыспен қамтылса, 2020 жылы аймағымыздың 8 елді мекенінде құны 4,2 миллиард теңгені құрайтын 60 жоба іске асырылды. Нәтижесінде 2019-2020 жылдары аталған бағдарлама бойынша 955 жаңа кәсіпкерлік нысан ашылып, жұмыссыздық деңгейі 5 процентке қысқарды.
Тұрар БЕКМЫРЗАЕВ
Жылдам ақпарат алу үшін Facebook, Instagram желілері мен Telegram каналымызға жазылыңыз!