Мемлекет басшысы Қасым-Жомарт Тоқаев «Жаңа Қазақстан: Жаңару мен жаңғыру жолы» атты биылғы Жолдауында жергілікті билік өкілдерінің ашық түрде елмен кездесу қажеттігін атап өткен болатын. Президент: «Барлық деңгейдегі әкімдер жыл бойы халықпен кездесулер өткізсін, халықты толғандыратын әлеуметтік мәселелерге баса назар аудара отырып, Қазақстанды жаңғыртудың жаңа бағдарының негізгі бағыттары туралы хабардар етсін және проблемалық мәселелерді шешудің жолдары мен мерзімдерін түсіндірсін», – деп атап өткен болатын.
Кеше қала әкімі Асылбек Шәменов Тасбөгет кенті тұрғындарымен кездесті. Кездесуде кентішілік әлеуметтік мәселер талқыланып, оның шешілу жолдарын қарастырды. Халықпен кездесуге шаһар басшысымен бірге қалалық мәслихат хатшысы Ибадулла Құттықожаев қатысты.
– Тасбөгет кенті маған бөтен емес. Мұндағы әрбір мәселе ұдайы назарымда. Енді тұрақты түрде тоқсан сайын сіздермен кездесіп тұрамын. Жаңа Қазақстанды құру жолында елмен етене араласып, халыққа қажетті шаралардың барлығы жасалады. Мемлекеттік бағдарламалар аясында ауқымды жұмыстар жасалып жатқаны елдің назарында. Оның ішінде «Өңірлерді дамыту 2020-2025» және «Ауыл – ел бесігі» бағдарламалары барысында кентке ауыз су тарту, жол жөндеу, көше шамдарын орналастыру мәселері ретімен іске асырылуда. «Қарапайым заттар экономикасы» аясында арнайы жобалар қаржыландырылып, басқа да қажетті шаралар қолға алынуда. Мұның барлығы – ел әлеуетін арттырудағы жоспарлы жұмыстар. Өндірісі өркендеген өңірдің кемел келешегі бұдан да жақсара түспек. Сол жарқын жолда халықпен бірлесе жұмыс істеуБұл жолғы халықпен кездесу форматы әдеттегідей ұзын-сонар баяндама, санамаласа саусақ шаршайтын сандар жиынтығымен жалғасқан жоқ. Билік пен бұқара арасында ашық диалог орнады.
Тасбөгеттің байырғы тұрғыны Жеңіс Сүлейменов кент ішінде небары екі аялдама бар екенін айта келіп, мектеп оқушылары қысы-жазы талдың саясында автобус күтетінін жеткізіп, кентке аялдама салынса деген ұсынысын айтты.Шаһар басшысы бұл мәселе жақын күні оң шешімін табатынын айтып, назарында ұстайтынын жеткізді.
Тасбөгеттіктердің әкім назарына ұсынған тағы бір түйткілді мәселесі каналды тазалау мен кент орталығындағы апаттық жағдайда деп танылған көпқабатты тұрғын үй мәселесі болды.
– Тасбөгетке қарасты Сабалақ саяжайында тұрамыз. Онда тұрғындардың бас ауруына айналған басты мәселе – қоғамдық көлік пен ауыз су. Осы екеуі шешімін тапса нұр үстіне нұр болар еді. Ол жерде де қаншама халық тұрып жатыр. Осыны назарыңызға алсаңыз, – деді Айгерім Бақыт есімді Сабалақ саяжайының тұрғыны.
Бұл сауалға қала әкімі жақында қалаға 150 автобус келетінін айтып, күзге таяу қоғамдық көлік мәселесі оң шешімін табатынын жеткізді. Содан соң тұрғын үй жайы халыққа өз реттілігімен кезек бойынша берілетінін түсіндірді. Ал аяқ су мәселесін кент әкімі Семсер Сыздықовқа қатаң түрде тапсырып, үш күннің ішінде есебін сұрайтынын жеткізді.
– Елдің ұсынысымен, пікірімен санасып жұмыс істелу керек. Сонда ғана ол өз нәтижесін береді деп есептеймін. Ел арасындағы аз-кем мәселелер кәсіпкерлер мен мекемелермен бірге, ұйымшылдықпен шешілу керек. Айтылған ұсыныстарға орай өзім арнайы тапсырма беріп, оның орындалу барысын қадағалаймын, – деді қала әкімі.
Т.БЕКМЫРЗАЕВ
Жылдам ақпарат алу үшін Facebook, Instagram желілері мен Telegram каналымызға жазылыңыз!