2026 жылдың 1 қаңтарынан бастап елімізде букмекерлік кеңселерге, тотализаторларға, ұялы байланыс операторларына қойылатын талап қатаңдайды. Ережені бұзғандарға ірі көлемде айыппұл салынады, деп жазады .Egemen.kz
Бұл өзгерістер «Әкімшілік құқықбұзушылық туралы кодекске толықтырулар енгізу туралы» заңда қарастырылған. Құжатқа 30 желтоқсанда Президент Қасым-Жомарт Тоқаев қол қойды.
Енді букмекерлік кеңселер мен тотализаторлар ұтыс төлеу операцияларын бірыңғай есепке алу жүйесінде толық көрсетуге міндетті. Аппараттық-бағдарламалық жүйелер де осы жүйемен біріктірілуі тиіс. Бұл талап орындалмаса, орта бизнеске 300 АЕК, ал ірі компанияларға 1 000 АЕК-ке дейін айыппұл салынады. Кей жағдайда лицензия уақытша тоқтатылуы мүмкін.
Ұялы байланыс операторларына да жауапкершілік күшейтілді. Егер олар халықтың телефондарына құмар ойындарды жарнамалайтын SMS-хабарламалар таратса, айыппұл төлейді. Айыппұл көлемі оператордың бизнес санатына байланысты белгіленеді.
Атап айтқанда, шағын операторларға – 50 АЕК, орта бизнеске – 100 АЕК, ал ірі операторларға 500 АЕК айыппұл қарастырылған.
Жылдам ақпарат алу үшін Facebook, Instagram желілері мен Telegram каналымызға жазылыңыз!