Алматыда белгісіз екі жігіттің қоршаудан секіріп, үйге басып кіргені түсірілген видео желіде тарады. Полицейлер оқиғаға қатысты түсініктеме берді. Бұл туралы Stan.kz ақпарат агенттігі хабарлайды.
Жазба авторы «оның үйіне азаматтық киім киген белгісіз біреулер кіріп, ағасы мен кәмелетке толмаған қарындасын ұра бастағанын» алға тартады.
Алматы қалалық ІІД баспасөз қызметі Әуезов ауданының полиция қызметкерлері алдын ала сөз байласу арқылы бір топ адамдар жасаған бөтеннің мүлкін ұрлау фактілерін анықтап жатқанын хабарлады. Іс-шаралар барысында қызметкерлер полициядан жасырынып жүрген 2005 жылы туған азаматты анықтады.
«Жедел-іздестіру іс-шаралары барысында қаскүнемнің жасырынған тұрғын үйі анықталды. Ол ұсталды. Сотталушы өз кінәсін толық мойындады», – деп хабарлады полицейлер.
Ведомствоның мәліметінше, қылмыстық іс Қылмыстық кодекстің 188-бабы «Ұрлық» бойынша тергелуде. Ұрланған мүлік тәркіленді.
«Қазір күдіктінің жеке басы басқа да ықтимал қылмыстық эпизодтарға қатысы бар-жоғы тексерілуде. Сонымен бірге, күдіктіні және оның туыстарын ұрып-соққаны туралы ақпарат шындыққа жанаспайтынын хабарлаймыз. ОП-ке жеткізілгеннен кейін ұсталған азамат М. медициналық тексеруден өтті, ол дене жарақатын жоққа шығарды», – деді полиция.
Жылдам ақпарат алу үшін Facebook, Instagram желілері мен Telegram каналымызға жазылыңыз!