Жыл басынан бері Қазақстанда 34 блогердің заңсыз онлайн-құмар ойындарды жарнамалағаны анықталды. Олардың ішінде 11-і әкімшілік жауапкершілікке тартылса, тағы 23 блогерге қатысты материалдар шара қабылдау үшін Мәдениет және ақпарат министрлігіне жолданды, деп хабарлайды ozgeris.info сайты Қаржы мониторингі агенттігіне сілтеме жасап.
Агенттік деректеріне сүйенсек, кейбір блогерлер бірнеше рет заңға бағынбаған. Мәселен, хип-хоп орындаушы Baller (Шыңғысхан Қопбаев) жыл басынан бері құмар ойындарын жарнамалағаны үшін бес рет әкімшілік жауапқа тартылған. Сондай-ақ 600 мыңнан астам жазылушысы бар блогер-музыкант Ринат Шамшыраққа да әкімшілік іс қозғалған.
Жеке инфлюенсерлердің заңсыз жарнамадан ірі табыс тапқаны белгілі болды.
- Наиль Турғанов онлайн-казиноны насихаттағаны үшін 8 миллион теңгеден астам қаражат алған.
- Нұрғазы Тоқтаров (Nakonay Qarapaiym) әлеуметтік желілерде агрессивті жарнама жүргізіп, 15,8 миллион теңге тапқан. Бірақ оның жартысына жуығын дәл сол платформаларда ұтылып қалған.
- Қайсар Қамза Telegram-арнасында жүйелі түрде тіркелу нұсқаулықтарын жариялап, жасанды бейнероликтер арқылы “жеңістерін” көрсеткен. Ол жарнамадан түскен қаржыны ашық түрде сәнді өмірге жұмсаған.
Заңсыз әрекеттерге әйел инфлюенсерлер де тартылған. Мысалы, Мариям Құлжабаева (@oomariko) стористеріндегі жарнамасын 350 мың теңгеге бағалаған. Агенттіктің мәліметінше, мұндай үгіт-насихаттың салдарынан отбасылар миллиондаған теңгесінен айырылған. Сонымен қатар, Зухра Хакиева, Диана Халметова, Әсем Аубакирова, Арина Байкова, Күмісай Айымбетова және басқа да блогерлер құмар ойындарды жарнамалаған.
Қаржы мониторингі агенттігі онлайн-казино жарнамасын азаматтар үшін қауіпті құбылыс деп бағалап отыр. Мұндай контент құмар ойынға тәуелділіктің «кіру нүктесіне» айналып, отбасылардың күйреуіне себеп болуда.
«Агенттік заңбұзушылардың әрекетін Қылмыстық кодекстің 28-бабының 5-бөлігі шеңберінде — яғни заңсыз ойын бизнесіне көмектесу ретінде қарастыруда. Сонымен бірге, онлайн-казино жарнамасына қылмыстық жауапкершілік енгізу ұсынылды.», — делінген хабарламада.
Соңғы екі жарым жылда Қазақстанда 205 жасырын казино жабылып, 224 адам қылмыстық жауапкершілікке тартылған. Елде заңсыз офлайн-гемблинг іс жүзінде жойылды. Алайда басты қауіп шетелдік онлайн-казинолардан туындап отыр. Жыл басынан бері олардың «айнасына» 17 мыңнан астам сілтеме бұғатталған. Қазіргі таңда реттеушілердің басты назары — осы платформаларға қаржы аударуға көмектесетін отандық төлем ұйымдарына аударылған.
Жылдам ақпарат алу үшін Facebook, Instagram желілері мен Telegram каналымызға жазылыңыз!