Мәжіліс депутаты Серік Ерубаев көлігін 5 минуттан артық қыздыру нормасын қайта қарауды ұсынды, деп хабарлайды BAQ.KZ тілшісі.
Былтыр Әкімшілік құқық бұзушылық туралы кодекске өзгерістер енгізу туралы заң жобасын талқылағанда «Ақ жол» демократиялық партиясының фракциясы оны сынға алып, заң жобасын қолдамаған.
Негізсіз айыппұлдарды қолданудан ең алдымен кәсіпкерлер мен көлік жүргізушілері зардап шегетіні баршаға мәлім. Бір мысал ретінде, кең резонанс алған, тұрақта қозғалтқышы 5 минуттан астам жұмыс істеп тұрғаны үшін айыппұл салу белсенділігін келтіруге болады, – деді депутат.
Мұндай санкция кәсіпкерлер үшін үлкен проблема тудыруда. Мысалы, тауарларды үй жанындағы дүкендерге тиеу және түсіру кезінде, әдетте, бөлінген 5 минуттан көп уақытты алады, ал қозғалтқышты -20 градус немесе одан да көп температурада өшіру мүмкін емес.
Жалпы алғанда, орталық және солтүстік аймақтарда қатты аяз болған кезде машинаны жылытуға 5 минуттан көп уақыт кететіндігі анық, – деп түсіндірді Ерубаев.
Депутаттар аймақтардың температуралық режимі мен климатын ескере отырып, жұмыс істеп тұрған қозғалтқышы бар тұрақ туралы норманы қайта қарап, зиянды шығарындыларды азайту бойынша баламалы және неғұрлым әділ шараларды пысықтау қажет деп санайды.
Серік Ерубаев осы және өзге де мәселелерге қатысты депутаттық сауалын ІІМ басшысына жолдады.
Жылдам ақпарат алу үшін Facebook, Instagram желілері мен Telegram каналымызға жазылыңыз!