Әнші Меруерт Түсіпбаева бала тәрбиесінде кездесетін қиын тұстарды атап өтті, деп хабарлайды Azattyq Rýhy.
«Баламды жалғыз өсірдім. Ұл баланы (мүмкін, қыз баланы да, кім білсін?!) әрдайым дұрыс жолға салып, талмай еңбектеніп, демеп, жігерлендіріп, кейде ұрсып, кейде алдап жетелеуге тура келеді. Қазіргі балаларда азғыру көп қой. Біздің бала күнімізде, ата-анамыздың бақытына орай, смартфондар мен гаджеттер болмады», – дейді әнші.
Оның айтуынша, өнерде жүрген әйелдің өмірі көбінесе түзде өтеді.
«Соған қарамастан, балама: «Саған сүйеу болар әкең жоқ, бірақ білімің болса – сен ең мықты адамсың. Сенің бойыңа сіңірген білімді ешкім тартып ала алмайды» деп айтып келемін. Бала тәрбиелеу – оңай шаруа емес, ол үлкен жауапкершілікті талап етеді. Бір ғана балам болса да, оның саналы, сапалы, білімді болып өсуі үшін табандылық таныттым. Тамыз айынан бастап-ақ үйде ұстаздар дайындық жүргізетін, 1 қыркүйекте сабаққа толық дайын болуы үшін», – дейді Түсіпбаева.
Әнші баланың тәрбиесіне үздіксіз көңіл бөлу керегін айтты.
«Бала – сынақ. Бұл сөздің шынайылығын жақсы түсінемін. Баланың тәрбиесі мен біліміне үздіксіз көңіл бөліңіз. Егер шаршап, қолды бір сілтесеңіз, жағдай қиындайды. Әр отбасы, әсіресе ана, баласының дұрыс тұлға болып қалыптасуына ерекше мән беруі керек. Өйтпесе, өмірдің зая кеткені. Адам өмірін бекер өткізген жоқ деп айту үшін, ол жақсы ұрпақ тәрбиелеп шығаруы керек. Кейде қолыңды бір сілтеп, бәрінен бас тартқың келетін сәттер болады. Бірақ оған жол бермеңіз. Кеше Мерейдің жетістігі туралы естіп, қатты қуандым. Бұл тек Мерейдің ғана емес, ең алдымен оның анасы Мақпал Жүнісованың жеңісі! IELTS емтиханында кейбір университет оқытушылары 5 балл алып, мәз болып жатады. Ал ең жоғары көрсеткіш – 9 балл екенін білесіздер», – деп жазды ол.
Жылдам ақпарат алу үшін Facebook, Instagram желілері мен Telegram каналымызға жазылыңыз!