Алматы тұрғындары тауда өрт шыққанын мәлімдеді. Олар құрғақ шөптің жанғанына алаңдаулы, себебі от тұрғын үйлерге дейін жақындаған, деп хабарлайды Stan.kz ақпарат агенттігі.
Өрт туралы Медеу ауданының тұрғандары мәлімдеді. Кеңсай-1 шағынауданында 6 қыркүйек таңғы 10:00 шамасында үйлер маңында түтін байқалған. Мұнда құрғақ шөп жанып, жалын үйлерге жақындай түскен.
«Біз бірден өрт сөндірушілерге қоңырау шалдық. Үйде әйелдер мен балалар ғана болғандықтан, қаладан ер адамдарды шақырдық. 12:00-де келген олар өртті сөндіре бастады. 13:00 шамасында біз жаққа бес өрт сөндіруші келді. Бұған дейін олар таудың екінші жағында өртті сөндірген», – дейді алматылық Жансая Смағұл.
Төтенше жағдайлар департаментінде Сәрсенбаев көшесіндегі үйлердің маңында құрғақ шөптің өртенгенін мәлімдеді.
«Тау бөктері өртенді. Хабарламаға Медеу ауданынан жеке құрамның 21 қызметкері мен 4 бірлік техника жіберілді. Сәрсенбаев көшесі екі телімге бөлінеді, бірақ біз қызметкерлерді барлық жер телімдеріне жібердік, жағдай бақылауға алынды», – делінген баспасөз қызметінің хабарламасында.
Айта кетейік, 6 қыркүйекте таңертең Алматыда жолаушыларға толы автобус өртеніп кеткен еді. Өрт сөндірушілер жарты сағаттан аз уақыт ішінде өртті толық сөндірген.
Жылдам ақпарат алу үшін Facebook, Instagram желілері мен Telegram каналымызға жазылыңыз!