Бүгінде «Қалаулым» – рейтингтің ең басында тұрған бағдарламаның бірі. Ел болып жұмылып бұл бағдарламаны жабуға тырыссақ та мүмкін болмады. Себебі көрермені өте көп. Көк жәшікке телміргендер осы бағдарламаны көруге асық. Негізі бағдарламаның мақсаты – екі жасты жұптастыру, шаңырақ құруға ұйытқы болу. Алайда бұл бағдарламада халқымызға жат қылықтар көрініс береді. Мәселен, біздің салтта қашан қыз жігітті айттырып келген. «Қалаулымнан» қалаулы жігіттерін іздеп келген қыздарды көріп, талай мәрте жағамды ұстадым. Қыз айттырған халықтың «Қыз жігітті айттырып келді» дегенін бұрын-соңды естіп пе едіңіз? Бұл бағдарламада мұны да көрдік. Оларда ұят, намыс жоқ па? Өн бойы инабаттылық пен ибалылықтан құралған қыз баласына жат қылық. Бұл жерде қыз баласының биязылығы байқалмайды.
Ел ішінде «бір жігітке сегіз қыздан келеді» деген сөз де бар. Алайда дәл осылай қыздың жұрт алдына шығып, жігіт іздеуі әбестік емес пе? Ұнату, ғашық болу, танысу арқылы өз жұбын таба алмай ма?
Осы бағдарламаға барып, нені көздеп отыр? Мақсаты не? Танымалдылық болар… Мұндай танымалдылықтың кімге, қандай пайдасы бар? Бұл біздің ұсақталып бара жатқанымыздың, батыстың теріс қылықтарын көргеніміздің пайдасы ма, әлде?
Қазіргі кейбір қыздардың махаббаттан тайынбай, ер-азаматқа «сені ұнатамын», «іздегенім сен» деген сөздеріне етіміз үйренген секілді. Әрине, бұл қазақ халқына өте жат нәрсе. Ал тепсе темір үзетін жігіттердің өзінің жарын бағдарламаға барып іздеуі үлкен қателік. Шыны керек, осындай қыз-жігіттердің кесірінен біздің тәрбиеміз бен санамыз жоғалып бара жатқандай. Тікелей эфирде отырып өз-өздерін көрсету үшін не бір жат қылықтар жасалып жатқанын байқаймыз. Келешекте жас буынға қандай тәрбие береміз? Сондықтан үлгі алар өнегесі жоқ бұл бағдарламаны жабу үшін әрекет еткеніміз жөн болар. Қыз – болашақ ана. Ұлтты тәрбиелейді. Теріс тәрбиеде өскен қыздар ертең өз ұрпағына қандай өнеге айтып, тәрбие береді? Ойланайық… Ой тастайық…
Арайлым ҚАЙРАТҚЫЗЫ,
Қорқыт ата атындағы Қызылорда университетінің студенті
Жылдам ақпарат алу үшін Facebook, Instagram желілері мен Telegram каналымызға жазылыңыз!