Алматыда Тимур Құлыбаевқа тиесілі компаниялар салған бизнес-орталықтың тағдыры қайтадан күн тәртібіне шықты. Мәжіліс депутаты Бақытжан Базарбек сот шешімімен мемлекет меншігіне қайтарылған жер учаскесіндегі ғимаратты сүру мәселесі көтерілетінін мәлімдеді, деп жазады Egemen.kz.
Депутаттың айтуынша, Жоғарғы сот бірінші сатыдағы және апелляциялық алқаның шешімдерін өзгеріссіз қалдырған. Осылайша, әл-Фараби атындағы Қазақ ұлттық университетіне тиесілі болған жер ресми түрде мемлекет меншігіне өтті.
«Енді Тимур және Динара Құлыбаевтарға тиесілі «Omirex» пен «Atlas Development» серіктестіктері екі жолдың бірін таңдауы керек. Заңға сәйкес, бизнес-орталықты өздері сүріп тастайды немесе оны ҚазҰУ-дың балансына береді. Мен бұл мәселені Мәжіліс мінберінен бірнеше рет көтердім. Ғимарат студенттерге қызмет етсе деген ұсыныс айтылды. Алайда компаниялар университетке беруден бас тартып отыр. Керісінше, жергілікті атқарушы органнан шығынды өтеуді талап етіп, жер қатынастары басқармасына арыз түсірген», деді Бақытжан Базарбек Мәжілістің Instagram парақшасында өткен тікелей эфирде.
Оның сөзінше, егер жер телімі босатылмаса, нысан мемлекетке қайтарылмаса немесе өз еркімен сүрілмесе, Мәжілісте сот шешімі арқылы мәжбүрлеп сүру мәселесін көтеруге ниетті.
«Заң бәріне ортақ», деді депутат.
Жылдам ақпарат алу үшін Facebook, Instagram желілері мен Telegram каналымызға жазылыңыз!