Алматыда оқу орталығының басшысы бірнеше рет алаяқтық жасағаны үшін сотталды. Ол 112-ден астам адамның 168 миллион теңгесін алдап алған, – деп хабарлайды Tengrinews.kz тілшісі Жоғарғы сот мәліметіне сілтеме жасап.
Алматы қаласы Бостандық ауданының N2 аудандық соты бірнеше рет алаяқтық (ҚК 190-бабының 3-бөлігі 4-тармағы) жасады деген айыпталушыға қатысты қылмыстық істі қарады.
Сот сотталушы оқу орталығын ұйымдастырып, басқарғанын анықтады. Ғаламтордағы үздіксіз жарнама және балалар шетелдік ЖОО-ға 100 пайыз түсетініне уәде беру, сондай-ақ Foundation бағдарламасы бойынша тұрғылықты қаладағы орталықта оқыту арқылы 112 адамды тартып, 168 миллион теңгеден астам қаражат жинаған.
қу ақысын төлеу үшін ол бөліп төлеу жоспарын немесе қосымша жеңілдіктер мен несиені жылдам өңдеу схемасын ұсынған. Алайда кейін шетелдік оқыту да, сертификаттар да берілмегені белгілі болды.
Осылайша, сотталушы алдау және сенімге қиянат жасау арқылы ірі көлемдегі ақшаны жымқырып, адамдарды жүйелі түрде алдаған. Оның кінәсі жәбірленушілер, куәлардың айғақтары, жасалған шарттар және сараптамалармен расталды.
Тараптардың ұстанымы
Сотталушы өз кінәсін мойындамады. Ол соттан өзін ақтауды немесе істі қайта тергеуге прокурорға қайтаруды сұрады.
Жәбірленушілер ең ауыр жаза тағайындауды, прокурор 7 жылға бас бостандығынан айыруды сұрады.
Сот үкімі
Бұл бап бойынша жаза 3 жылдан 7 жылға дейін шектеу немесе бас бостандығынан айыру жазасын қарастырады.
Сот сотталушыны кінәлі деп танып, 7 жылға бас бостандығынан айырды. Қазақстан Республикасы Конституциясының 30 жылдығына арналған «Рақымшылық туралы» заңға сәйкес, мерзімі 1/5 бөлігіне қысқартылды – түпкілікті жаза 5 жыл 7 ай 6 тәулікке бас бостандығынан айыру.
112 жәбірленушінің 7-еуіне келтірілген шығынды ішінара өтеу жауапкершілікті жеңілдететін мән-жай болды. Ешқандай ауырлататын мән-жайлар анықталған жоқ. Азаматтық талап қоюлар толығымен қанағаттандырылды – сотталушыдан жәбірленушілердің пайдасына 168 миллион теңгеден астам сома өндірілді.
Жылдам ақпарат алу үшін Facebook, Instagram желілері мен Telegram каналымызға жазылыңыз!