3-желтоқсан мүмкіндігі шектеулі азаматтардың халықаралық күні. Бұл Біріккен ұлттар ұйымының ұйғарымымен 1992 жылдан бастап атап өтілуде. Мақсаты – мүмкіндігі шектеулі азаматтардың құқықтарын сақтау, әлеуметтік жағдайын жақсартуға айрықша назар аудару. Атаулы күнге орай «Ten qogam» әлеуметтік орталығы арнайы шара ұйымдастырды.
Қала әкімінің қолдауымен қалалық жұмыспен қамту, әлеуметтік бағдарламалар және азаматтық хал актілерін тіркеу бөлімі мен «Алтаир-Бөбек» қайырымдылық қоры және «Жылы жүрек» жастар қоғамдық қорының бірлесе ұйымдастыруымен өткізілген шараға өмірлік қиын жағдайда қалған ерекше азаматтар қатысты.
Шараның ашылуында қалалық жұмыспен қамту, әлеуметтік бағдарламалар және азаматтық хал актілерін тіркеу бөлімінің басшысы Кенжегүл Құрақбаева сөз сөйлеп, ізгі лебізін білдірді.
– Бұл күн жыл сайын аталып өтеді. Оған облыс орталығындағы он мыңға жуық мүмкіндігі шектеулі азамат шақырылады. Сіздер әрқашан да қоғаммен тығыз байланыстасыздар. Өздеріңізге арналып «Ten qogam» әлеуметтік орталығы ашылды. Бұл жерде кез келген уақытта құқықтық кеңес алуға, рухани демалуға мүмкіндіктеріңіз бар. Сіздерге деген айырықша қамқорлық пен риясыз қолдау жүйелі түрде жалғасын таба береді. Еліміз аман, деніміз сау болсын, – деді бөлім басшысы.
Шара қорытындысында «Тең қоғам» әлеуметтік орталығының жетекшісі Марат Жайылханұлы бірқатар өнерпазды арнайы алғыс хатпен марапаттады. Олардың қатарында Айша Айтманбетова, Мұрат Ізбенбетов, Ақмарал Әлжанова, Кенжегүл Махамбетова, Рая Ахметова, Гауһар Оразалиева, Тамара Ақманбетовалар бар. Шынайы көңіл, жайдары жүз, ыстық ықылас мұндағы әрбір адамның дидарынан айқын сезіліп тұрды. Ол өздеріне деген ішкі сенімі мен елге деген ерекше ілтипаты болатын.
Атаулы күн қарсаңында арнайы дастархан жайып, құрмет көрсеткендері үшін мұнда келушілер алғаусыз алғыстарын айтып жатты.
– Біреудің көмегіне зәру кембағыл жандарға құрметтің қай түрі де артық етпейді. Біздің әрбір басқосуымызда бүгінгі тыныс-тіршілігіміз сараланып, алдағы жоспарымыз айқындалады. «Тең қоғам» орталығына мүмкіндігі шектеулі азаматтар көптеп келеді. Ортақ тіл табысып, әңгімелесеміз. Бізге осындай мүмкіндіктер беріп, барынша қолдауларын көрсетіп жатқан ел ағаларына ризашылығымды жеткізгім келеді, – деді Рая Ахметова
Ашылғанына аз уақыт болса да «Тең қоғам» әлеуметтік орталығы өткізіп жатқан шаралар мүмкіндігі шектеулі жандарға үлкен қолдау болып отыр. Оның ішінде семинар-тренингтер, спорттық жарыстар салауаттылыққа тәрбиелеп, сауықтыруға бағыттайды. Бұл жиын соның дәріпті жалғасындай. Кездесу барысында қалалық «Мүгедектер» қоғамының жетекшісі Сәкен Алдашбаев, «Жылы жүрек» жастар қоғамдық қорының жетекшісі Сағатбек Қуанышбайұлы жылы лебіздерін білдіріп, мерекелік құтықтауларын жеткізді.
Иә, өмір болған соң түрлі тағдырдың болуы да заңдылық. Тәңірден келген сынаққа төзімділік танытып, табанды күресе білу үлкен жүректілікті қажет етеді. Олар осынысымен де қай құрметке де лайықты.
Тұрар БЕКМЫРЗАЕВ
Суретті түсірген Нұрболат НҰРЖАУБАЙ
Жылдам ақпарат алу үшін Facebook, Instagram желілері мен Telegram каналымызға жазылыңыз!