Қызылорда қалалық санитариялық-эпидемиологиялық бақылау басқармасының кешенді іс-шаралар жоспарына сәйкес, Қызылорда облысының денсаулық сақтау басқармасымен бірлесіп тұмау және жіті респираторлық вирустық инфекциялардың алдын алу бағытында жұмыстар қарқынды жүргізілуде. Аталған тақырыпқа байланысты Қызылорда қалалық санитарлық-эпидемиологиялық бақылау басқармасының басшысы Бейбіт Бидаш пен “Ұлттық сараптама орталығы” Қызылорда облысы бойынша филиалының директоры Фарида Қалиеваның қатысуымен баспасөз конференциясы өтті.
2025 жылдың 10 айында қала бойынша ЖРВИ-дің 77 612 жағдайы тіркелген, оның 48 037-сі 14 жасқа дейінгі балалар. 100 мың тұрғынға шаққандағы аурушаңдық көрсеткіші – 20 352,4, ал балалар арасында – 38 374,6. Былтырмен салыстырғанда көрсеткіш 10,4%-ға төмендеген. Ал, тұмаудың 53 жағдайы анықталған, оның 35-і – балалар арасында. Бұл өткен жылмен салыстырғанда 29,5%-ға аз.
Эпидемиялық маусым алдындағы кезеңде ЖРВИ-дің 10 450 жағдайы тіркеліп, тұмаудың 49 оқиғасы анықталды. Жаңа оқу жылының алғашқы екі айында 56 мектепте 1822 оқиға тіркелді, бұл көрсеткіш эпидемиологиялық шектен аспайды.
Қалада тұмау мен ЖРВИ-дің алдын алу және таралуын болдырмау мақсатында денсаулық сақтау, санитариялық-эпидемиологиялық бақылау және білім беру басқармаларының бірлескен бұйрығымен кешенді іс-шаралар жоспары бекітілген. Барлық емдеу ұйымдарында медицина қызметкерлеріне арналған семинарлар ұйымдастырылып, аурудың алғашқы белгілері мен алдын алу тәсілдері түсіндірілді.
Тұмаудан қорғанудың ең тиімді жолы – вакцинация. ҚР Бас мемлекеттік санитариялық дәрігерінің 2025 жылғы 22 тамыздағы №6 қаулысына сәйкес, 23 қыркүйектен бастап қауіпті топтар арасынан 36 910 адам тұмауға қарсы «Гриппол плюс» вакцинасымен қамтылды. Сонымен қатар, жұмыс берушілер есебінен 1 520 қызметкер егілді.
Қызылорда қаласындағы вирусологиялық зертхана эпидемиялық маусымға толық дайын. Материалдық-техникалық база жаңартылып, реактивтер мен жабдықтар қоры толықтырылды. Зертханада 3 заманауи ПТР құрылғысы орнатылған. 2025 жылдың 26 қыркүйегінен бастап сынамалар қабылданып, облыс бойынша 3 418 зерттеу жүргізілді. Оның ішінде тұмау А типі – 86, ЖРВИ – 8, COVID-19 – 2 жағдай расталды.
Сапаны сыртқы бағалау мақсатында Ұлттық референс зертханаға жіберілген сынамалар толық расталды. Зертхана мамандарының айтуынша, мониторинг және профилактикалық шаралар тұрақты жүргізіліп, биологиялық қауіпсіздік талаптары күшейтілген.
Мамандар тұрғындарға тұмау белгілері байқалған жағдайда өздігінен ем қабылдамай, дәрігерге жүгіну қажеттігін ескертті. Себебі уақытылы емделмеу асқынуларға, тыныс алу, жүрек-қантамыр және жүйке жүйесі ауруларына әкелуі мүмкін.
Жылдам ақпарат алу үшін Facebook, Instagram желілері мен Telegram каналымызға жазылыңыз!