Ұзақ өмір сүргендердің тек 10%-ы ғана генетикалық факторларға байланысты, ал басты рөлді өмір салты мен әдеттер атқарады, деп хабарлайды El.kz интернет порталы.
Бұл туралы Ресейдегі Қартаюды зерттеу институтының ғылыми қызметкері, медицина ғылымдарының кандидаты Михаил Болков мәлімдеді.
Ғалымның айтуынша, кей отбасыларда бірнеше буын бойы халықтың орташа көрсеткіштерінен әлдеқайда жоғары жасқа жету үрдісі байқалады. Бұл жағдай сыртқы қиындықтарға қарамастан орын алып отырады.
Ұзақ өмір сүрушілердің генін зерттеу әрдайым ғалымдарды қызықтырып келді. Егер бұл ген табылса, ғалымдар ұзақ өмір сүруді мақсатты түрде гендік терапия арқылы дамытуға мүмкіндік алар еді. Өкінішке орай, кейбір ген нұсқаларының рөлін дәлелдейтін зерттеулер бар болғанымен, әзірге ерекше әрі бірегей рецепт табылған жоқ, – дейді Болков.
Сонымен қатар, ғалым генетиканың отбасылық ұзақ өмір сүруге қосатын үлесін, сондай-ақ қоршаған ортаның және өмір салтының маңыздылығын анықтайтын зерттеулердің де бар екенін атап өтті. Сарапшының айтуынша, тұқым қуалаушылықтың рөлі көбіне артық бағаланады.
Отбасындағы тәрбие кейде тұқым қуалаушылықтан да маңыздырақ. Белгілі бір өмір салты мен тамақтану, мінез-құлық, еңбек пен мәдениет дағдылары — мұның бәрі генетикалық емес факторлар, – деп түсіндірді маман.
Сарапшының сөзінше, 2018 жылы жүргізілген ауқымды зерттеу бірнеше миллион отбасын қамтып, тұқым қуалаушылықтың ұзақ өмір сүруге ықпалын нақтылауға мүмкіндік берді. Зерттеу қорытындысы көрсеткендей, отбасылық ұзақ өмір сүру белгілі бір дәрежеде байқалғанымен, тұқым қуалаушылықтың үлесі тек шамамен 10%-ды құрайды.
Жылдам ақпарат алу үшін Facebook, Instagram желілері мен Telegram каналымызға жазылыңыз!