28 маусым – Бұқаралық ақпарат құралдары қызметкерлерінің күніне арналған «Қанатты қалам – 2022» салтанатты шара өтті. Мерекелік кешке облыс әкімі Нұрлыбек Нәлібаев қатысып, төртінші билік өкілдерін төл мерекемен құттықтап, үздік журналистерді марапаттады.
– Ақпарат тасқыны алапат дәуірде таңдаған мамандығына адал болып, ұстанымын өзгертпеген, қалам қасиетін ардақ тұтқан журналистер қауымына жақсы тілектерімізді айту үшін жиналып отырмыз. Өздеріңіздей туған жердің тарихын қадір тұтып, бүгінгісіне марқайып, ертеңіне алаңдайтын қауыммен жүздесу – біз үшін үлкен қуаныш. Тәуелсіздіктің алғашқы күндерінен бастап ел дамуының барлық кезеңдерінде бүгінімізді бекем, болашағымызды жарқын ету жолында сіздер де зор үлес қосып, ең қиын сәттерде жүректерге сенім ұялататын шынайы ақпарат тараттыңыздар, халықтың ертеңге деген сенімін арттырдыңыздар. Сенсацияны мақсат тұтқан жаңалықтардың ақ-қарасын ажыратып, көрермен мен оқырманға дұрысын жеткізу үшін тынбай еңбек еттіңіздер. Ағайынның ауызбірлігі, қалтқысыз сенім, қиналғанда бір-біріне қол созған қайырымды жандар туралы көрсетілім, мақала ұйымдастырасыздар. Сол үшін де сіздерге Сыр жұртшылығы атынан зор ризашылығымды білдіремін, ел үшін жасап жүрген еңбектеріңізге бас иеміз, − деді облыс әкімі.
Қазіргі кезде аймақтың медиа кеңістігінде 130-дан аса бұқаралық ақпарат құралы жұмыс істейді. Заман талабына сай жаңару мен жаңғырудың жолын ұстанған бұл сала іргелі индустрияға айналды. Биыл Сыр өңірінде айтулы мереке ерте тойланды. Ең алдымен БАҚ қызметкерлері арасында еркін форматта караоке батл сайысы өткізілді. Сондай-ақ алғаш рет еліміздің барлық аймақтары қаламгерлерінің басын қосқан облыс әкімінің кубогы үшін шағын футболдан республикалық турнир ұйымдастырылды.
Шара барысында облыс әкімі сала ардагерлеріне ерекше құрмет көрсетті. Атап айтсақ, «Еңбек ардагері» медалімен Қызылорда қоғамдық телерадиокомпаниясының атқарушы директоры Мұрат Шалабаев, «Ақпарат саласының үздігі» төсбелгісімен «Тұран-Қазалы» серіктестігінің директоры, газеттің бас редакторы Ғазиз Әліш марапатталды. Сонымен қатар аға буын журналистер ҚР Ақпарат және қоғамдық даму министрінің Құрмет грамотасымен марапатталды. Ал облыс әкімінің Құрмет грамотасын алған журналистерге шипажайға жолдама берді.
«ШАҺАР КЕЛБЕТІ» НОМИНАЦИЯСЫ БҰЙЫРДЫ
Одан кейін ақпарат ағынынан қалмай, өз көрермендері мен оқырмандарына адал қызмет етіп, мамандығын қадір тұтқан БАҚ өкілдерінің үздіктері ерекше қошеметке ие болды. Мереке қарсаңында қызылордалық біршама журналистерге облыс әкімінің арнайы номинациясы, алғыс хаты мен бағалы сыйлықтары табысталды. Айта кету керек, үздіктер қатарында «Ақмешіт апталығы» газеті де бар. Басылымның бас редакторы Әзиз Батырбеков «Шаһар келбеті» номинациясының иегері атанды.
АҚТІЛЕК БІТІМБАЙ –
ЕҢ ҮЗДІК ЖАС ЖУРНАЛИСТ
Мереке қарсаңында журналист Сағитжан Бермағанбетов атындағы «Ең үздік жас журналист» атты дәстүрлі облыстық байқауы ұйымдастырылды. Оның мақсаты – жас журналистердің шығармашылығын шыңдап, мемлекеттік тілдің қолдану аясын кеңейту. Байқауға жасы 30-ға дейінгі бұқаралық ақпарат құралдарында жұмыс істейтін тілшілер мен тәуелсіз қаламгерлер қатысты. Қатысушылардың еңбектерін сараптау барысында тақырыптың өзектілігі және маңызы, зерттеу әдістерін қолдана білуі есепке алынды.
Ең үздік жас журналистерді марапаттау сәтінде Сағитжан Бермағанбетовтің анасы Меруерт апай сахна төріне шақырылды. Облыс әкімі өткір сөзді, талантты перзентті дүниеге әкелген анаға құрмет көрсетті. Осы байқауда әріптесіміз «Ақмешіт апталығы» газетінің тілшісі Ақтілек Бітімбай «Ең үздік жас журналист» номинациясын иеленді.
Одан кейін Қазақстан Журналистер одағы облыстық филиалының төрағасы, «Сыр медиа» жауапкершілігі шектеулі серіктестігінің бас директоры, облыстық мәслихат депутаты Аманжол Оңғарбаев бір топ БАҚ өкілін Қазақстан Журналистер Одағының Құрмет грамотасымен марапаттады. Айта кетейік, биыл Қазақстанның «Құрметті журналисі» атағы ардагер-журналист Жаңабай Кемалға табысталған болатын. Сондай-ақ, әріптестіміз Нұрсұлтан Мықтыбаев Қазақстан Журналистер одағының сыйлығына ие болды.
Мерекелік шараға мәдениет майталмандарымен бірге журналистердің өздері де өнерін ортаға салып, әннен шашу шашты.
Ақмарал ОЛЖАБАЕВА
Жылдам ақпарат алу үшін Facebook, Instagram желілері мен Telegram каналымызға жазылыңыз!