Қызылорда қалалық соты осы жылдың 9 айында атқарған жұмыстарын таразылады. Оны қалалық сот төрағасы Дархан Кентбаев жүргізіп, атқарылған іс-шаралар барысына кеңінен тоқталды.
Атап айтқанда, Қызылорда қалалық сотына мерзімді уақыт ішінде 6403 талап қою мен 187 азаматтық іс түскен. Салыстырмалы түрде қарағанда 2021 жылдың 9 айында азаматтық іс жүргізу тәртібімен барлығы 7808 талап қою, 269 азаматтық іс түскен. Аяқталған азаматтық істердің саны 4286-ны құрайды.
– Неке бұзу бойынша арыз-шағымдар көп түсуде. Бұған көбіне жұмыссыздықты, ерлердің ішімдік ішуін алға тартады. Балалары бар отбасыларды татуластыруға тырысамыз. Мәселен, 9 ай ішінде неке бұзу бойынша 919 азаматтық іс аяқталған. Оның ішінде 169-ы талап қоюшыға қайтарылған, 36 іс медиация тәртібімен қаралған, 319 қараусыз қалдырылған. Сонымен қатар алимент төлеуден қашып жүрген әкелер көп. Олар көбіне өздерін жұмыссыз ретінде көрсетеді. Осылайша төлейтін алименттерін аз етіп көрсетеді немесе төлеуге шамалары келмейтінін алға тартады, – деді Д.Несіпбайұлы.
Қазіргі таңда татуласу рәсімдерімен аяқталған істердің сандарын көбейту бағытындағы жұмыстар кеңінен қолға алынған. Мәселен, 9 ай ішінде 16 іс бітімгершілікпен, 525 іс медиация тәртібімен, 2 іс партисипативтік рәсім тәртібімен, яғни барлығы 543 іс татуласу рәсімдерімен аяқталған. Яғни былтырғы жылдың осы мерзімімен салыстырып қарағанда татуласу рәсімдерімен қараған істердің саны 232-ге көбейген.
А.АЙТЖАНОВА
Жылдам ақпарат алу үшін Facebook, Instagram желілері мен Telegram каналымызға жазылыңыз!