Қазақстан Республикасының сот жүйесінде кассациялық саты ерекше маңызға ие. Ол төмен тұрған соттардың шығарған сот актілерінің заңдылығы мен негізділігін тексеру арқылы азаматтардың құқықтары мен бостандықтарын қорғауға, сот төрелігінің бірізділігін қамтамасыз етуге бағытталған.
Кассациялық сатының басты міндеті – заң нормаларының дұрыс қолданылуын қамтамасыз ету. Яғни, егер бірінші немесе апелляциялық сатыдағы соттар іс жүргізу барысында материалдық немесе процессуалдық құқық нормаларын бұзса, кассациялық сот бұл бұзушылықтарды түзетеді.
Қазақстан Республикасының Қылмыстық-процестік кодексінің 476-бабына сәйкес, кассациялық тәртіппен заңды күшіне енген сот актілеріне шағым немесе наразылық келтіру мүмкіндігі қарастырылған. Бұл құқық сот төрелігінің ашықтығы мен әділдігін қамтамасыз етудің кепілі болып табылады.
Кассациялық сатының жұмысы Жоғарғы Соттың құрылымында жүзеге асырылады. Ол тек құқықтық мәселелерге баға береді және фактілерді қайта қарауға құқылы емес. Бұл – кассациялық сатының басты ерекшелігі. Яғни, сот дәлелдемелерді жаңадан зерттемейді, тек сот актісінде заңның дұрыс қолданылғанын тексереді.
Сонымен қатар, кассациялық сатының шешімдері сот тәжірибесін қалыптастыруда маңызды рөл атқарады. Олар төмен тұрған соттар үшін құқық қолдану тәжірибесінде бағыт-бағдар береді, осылайша сот тәжірибесінің біркелкілігін қамтамасыз етеді.
Кассациялық сатының қызметі сот жүйесінің әділдігін арттырып қана қоймай, азаматтардың сотқа деген сенімін нығайтады. Бұл сатының тиімді жұмысы – құқықтық мемлекеттің дамуының маңызды көрсеткіші.
Қорытындылай келе, кассациялық соттардың қызметі – сот төрелігінің сапасын арттырудың шешуші тетігі. Ол сот актілерінің заңдылығын, негізділігін және әділдігін қамтамасыз ету арқылы азаматтардың құқықтары мен мүдделерін қорғауға зор үлес қосады.
Нұржігітов Қанат Болатұлы
Қызылорда қаласының мамандандырылған тергеу сотының бас маманы – сот отырысының хатшысы
Жылдам ақпарат алу үшін Facebook, Instagram желілері мен Telegram каналымызға жазылыңыз!