Қалада қоғамдық ахуал тұрақты. Атап айтсақ, жалпы құқық бұзушылықтың тіркелуі өткен жылмен салыстырғанда 14 пайызға немесе 331 қылмысқа төмендеген. Бұл жөнінде баспасөз орталығында өткен брифингте Қызылорда ҚПБ бастығы, полиция полковнигі Әбдібек Жаназаров мәлім етті.
Қазіргі таңда полицияның қызмет атқару аймағы бойынша қала үш аймаққа бөлінген. Яғни облыс орталығы және Ақсай, Тасбөгет полиция бөлімдерінің аймақтары. Сонымен қатар қалаға қарасты 8 елді мекенде 8 учаскелік инспекторы мен 4 көмекші қызмет атқаруда. Олар қаламыздың тыныштығын сақтауда өз қызметтерін мүлтіксіз орындауда. Қылмыстық жағдайдың алдын алу мақсатында атқарылған жұмыстар ауқымды. Соның нәтижесінде қоғамдағы ахуал тұрақты.
– Жыл басынан тіркелген қылмыстың 38 пайызын ұрлық, 26 пайызын алаяқтық қылмыстары құраса, қалғандарын өзге санаттағы қылмыстар құраған. Қылмыстың кезекші тәулікте ашылуы 44 пайызды құраса, ауыр және аса ауыр санаттағы қылмыстардың ашылуы 61 пайызды құрап, өткен жылмен салыстырғанда 9,2 пайызға жоғарылаған. Бүгінде «102» арнасы арқылы тәулігіне 150-ден астам әртүрлі хабарламалар тіркеледі. Өткен жылы қала көлемінде криминогендік ахуалды сауықтыру бағытында 12 айда жекелеген қылмыс түрлерінің алдын алуға байланысты «Пәтер», «Қару», «Мал ұрлаушы», «Автоұрлық», «Аккумулятор» «Құқықтық тәртіп» атты жедел профилактикалық іс-шаралар ұйымдастырылды. Сонымен қатар мереке күндері, сенбі, жексенбі күндері ахуалы күрделі деген 50 шақты кафе-барларға қосымша қызметкерлер қойылды. Соның нәтижесінде әр түрлі әкімшілік құқық бұзғаны үшін 162 369 азаматқа әкімшілік хаттамалар толтырылды, – деді Әбдібек Сламбекұлы.
Жалпы қаладағы бейне бақылау камералары полицейлерге қоғамдық тәртіпті сақтауда септігін тигізуде. Мәселен, осы бейнебақылау камераларының көмегімен бір жылда 29387 әкімшілік құқық бұзушылықтар анықталса, 136 қылмыс ашылған. Сондықтан да қала көшелерінде бейне бақылау камераларын орнатудың маңызы зор. Облыс орталығында басқармаға қарасты жедел басқару орталығымен бақыланатын 272 бейнебақылау камералары орнатылған.
Қоғамда қылмыстың көбеюіне спирттік ішімдікті шектеусіз сату да әсер етеді. Себебі ішімдік ішкен адам қылмыс жасауы немесе құрбаны болуы мүмкін. Сондықтан да басқарма тарапынан мұндай жұмыстарға да қадағалау болып тұрады.
– Мәселен, өткен жылы 71 дүкен иесіне кәмелетке толмағанға спирттік өнім сатқаны үшін, белгіленген уақыттан кейін шектеусіз спирт өнімін сатқаны үшін 470 дүкен иесіне, түн тыныштығын бұзғаны үшін 120 ойын сауық орындарына, кәмелетке толмағандарды түнгі уақытта ойын сауық орындарына кіргізгені үшін 162 кәсіпкерге әкімшілік шара көрілді. Жол көлік оқиғаларының алдын-алу мақсатында да түрлі профилактикалық бағытта «Қауіпсіз жол», «Жаяу жүргінші», «Заңсыз жолаушы тасымалдаушы», «Автобус» атты жедел профилактикалық іс-шаралар бірнеше реттен ұйымдастырылды. Нәтижесінде 12 айдың қорытындысымен орын алған жол көлік оқиғалары 2,8 пайызға төмендеген, – деді қалалық ішкі істер басқармасының бастығы Әбдібек Жаназаров.
Қалалық полиция басқармасы қылмыс жасауға бейім жасөспірімдерге қатысты профилактикалық жұмыстарды күшейтіп, нәтиже шығаруды мақсат еткен. Мәселен, өткен жылы кәмелет жасқа толмағандарға қарсы жасалған қылмыс 44,1 пайызға, ал кәмелетке толмағандар арасында қылмыс 48,9 пайызға төмендеген. Қазіргі таңда кәмелетке толмағандармен және оларға қарсы жасалатын қылмыстардың алдын-алу бағытында «Жасөспірім», «Балалар қысқы демалыста», «Қауіпсіз мектеп», «Балалар түнгі қалада» атты жедел профилактикалық шаралар ұйымдастыруда.
– Бір жылда атқарылған шаралардың нәтижесінде қаламызда қылмыс саны төмендеді. Полиция басқармасы өз құзыреті шегінде тиісті жұмыстарды атқаруда. Қазіргі қазақстандық полицияның өзекті міндетінің бірі қолжетімділікті және ашықтықты арттырып, тұрғындармен өзара тиімді байланыс жасауға тиіс. Сондықтан жұмыс тиімділігі халықтың сенімімен ғана өлшенеді. Біз қауіпсіздіктің алдын алу бағытындағы міндеттерімізді атқаруға тиістіміз, – деді Әбдібек Сламбекұлы.
Жылдам ақпарат алу үшін Facebook, Instagram желілері мен Telegram каналымызға жазылыңыз!