Қызылорда облысында әлеуметтік маңызы бар азық-түлік түрлеріне мониторинг және талдау жүргізіп жатыр деп хабарлайды Stan.kz ақпарат агенттігі.
ҚР Қаржылық мониторинг агенттігінің мәліметінше, мониторинг барысында басты назар өңірде өндірілетін азық-түліктің өзіндік құнына аударылды.
Департаменттің талдау тобы күріш өндіретін ең ірі 9 кәсіпорынның баға белгілеу жұмыстарына талдау жүргізілді. Оның нәтижесіне сәйкес, Қаржылық мониторинг агенттігінің облыстық өкілдігі 6 күріш өндіретін компанияның бағаны көтеруі қаншалықты негізді екендігін білу үшін тексеру тағайындады.
“Өзге кәсіпорындар өңірдің әлеуметтік дүкендерінде саудалау үшін облыстың Тұрақтандыру қорына арналған күріштің килограмын 420-дан 350-ге дейін түсіруге келісті. Қазіргі таңда әлеуметтік дүкендерде күріштің килограмын 350 теңгеден аспайтын бағада саудалау жұмыстары жергілікті органдар мен «Байқоңыр» әлеуметтік кәсіпкерлік корпорациясы арасында қарастырылып жатыр”, – делінген хабарламада.
Еске салайық, Қазақстанда былтыр күріш 36%-ға қымбаттаған еді.
Жылдам ақпарат алу үшін Facebook, Instagram желілері мен Telegram каналымызға жазылыңыз!