Қазіргі қоғамда мемлекеттік қызметтердің қолжетімділігі мен ашықтығы азаматтардың құқықтық сенімін қалыптастыруда шешуші рөл атқарады. Осы тұрғыда сот жүйесін цифрландыру – уақыт талабы. Қазақстанда енгізілген «Сот кабинеті» электронды сервисі сот төрелігін жүзеге асырудың жаңа, тиімді үлгісін қалыптастырып, бұрынғы дәстүрлі жүйемен салыстырғанда бірқатар маңызды артықшылықтарды көрсетті.
Бұрынғы жүйе: уақыт пен ресурстың көп шығыны
Цифрландыруға дейін сотқа жүгіну үдерісі азаматтар үшін едәуір қиындықтар туғызатын. Талап арыздар мен өтініштер қағаз түрінде қабылданып, сот кеңселеріне бірнеше рет баруды талап ететін.
Сонымен қатар, сот қызметіне тікелей бару қажеттілігі адам факторына тәуелділікті арттырып, кей жағдайда түсініспеушіліктер туындап жататын. Бұл сот жүйесіне деген қоғамдық сенімге де кері әсерін тигізді.
Сот кабинеті: құжаттарға қолжетімділіктің жаңа деңгейі
«Сот кабинеті» сервисі осы олқылықтардың орнын толтырып, сотқа жүгіну рәсімдерін айтарлықтай жеңілдетті. Бүгінде азаматтар мен заңды тұлғалар сотқа талап арыздар мен өтініштерді электронды форматта жолдап, қажетті құжаттарды қоса тіркей алады.
Ең бастысы – сот ісіне қатысты барлық құжаттарға бір платформа арқылы қол жеткізу мүмкіндігі бар. Пайдаланушылар сот актілерін, ұйғарымдар мен шешімдерді онлайн түрде алып, істің қозғалысын нақты уақыт режимінде бақылай алады. Бұл бұрынғыдай сот кеңселерінің табалдырығын тоздыруды қажет етпейді және уақытты едәуір үнемдейді.
Ашықтық пен жариялылықтың артуы
Сот кабинетінің басты артықшылықтарының бірі – сот қызметінің ашықтығын қамтамасыз етуі. Бұрын азаматтар ісінің қай сатыда тұрғанын білу үшін сотқа барып немесе телефон арқылы хабарласуға мәжбүр болса, қазір бұл ақпарат толықтай электронды жүйеде көрініс табады.
Әрбір іс бойынша қабылданған шешімдер, сот отырыстарының уақыты мен нәтижелері пайдаланушының жеке кабинетінде көрсетіледі. Мұндай ашықтық сот процесінің жариялылығын арттырып, қоғамның сот жүйесіне деген сенімін нығайтады.
Сыбайлас жемқорлықтың алдын алудағы маңызы
«Сот кабинеті» сыбайлас жемқорлық тәуекелдерін төмендетуде де маңызды құралға айналды. Электронды форматта қызмет көрсету адам мен адам арасындағы тікелей байланысты азайтып, бейресми қатынастарға жол бермейді.
Құжаттарды қабылдау, тіркеу, бөлу және қарау процестері автоматтандырылғандықтан, шешім қабылдаудың айқын әрі әділ болуы қамтамасыз етіледі. Бұл – бұрынғы жүйемен салыстырғанда сот саласындағы адалдық пен заңдылықты нығайтудың нақты тетігі.
Азаматтарға қолайлы әрі тиімді сервис
Сот кабинеті – тек сот органдары үшін емес, қарапайым азаматтар үшін де ыңғайлы сервис. Интернетке қолжетімді кез келген жерден сотқа жүгіну мүмкіндігі халықтың құқықтарын қорғауды жеңілдетіп, құқықтық мәдениеттің дамуына ықпал етеді.
Сонымен қатар, электронды сот қызметтері мемлекеттік шығындарды азайтып, қағазбастылықты қысқартуға мүмкіндік берді. Бұл экологиялық және экономикалық тұрғыдан да тиімді шешім болып отыр.
Қорытынды
Бұрынғы дәстүрлі сот ісін жүргізу жүйесімен салыстырғанда «Сот кабинеті» – сот төрелігін жүзеге асырудың сапалы жаңа кезеңі. Ол құжаттарға қолжетімділікті арттырып, сот қызметінің ашықтығын қамтамасыз етіп қана қоймай, сыбайлас жемқорлықтың алдын алуда маңызды рөл атқарады.
Цифрлық сот төрелігі – азаматтардың құқықтарын тиімді қорғауға, әділ әрі ашық сот жүйесін қалыптастыруға бағытталған сенімді қадам. Осы тұрғыда «Сот кабинеті» заман талабына сай, қоғам сұранысына жауап беретін маңызды электронды платформа ретінде өз тиімділігін дәлелдеп отыр.
Қызылорда облысының мамандандырылған
ауданаралық әкімшілік сотының бас маманы А.Өмірзақ
Жылдам ақпарат алу үшін Facebook, Instagram желілері мен Telegram каналымызға жазылыңыз!