27 қыркүйекте Испания Ла Лигасының 7-турында мадридтік «Атлетико» өз алаңында «Реалды» қабылдап, 5:2 есебімен жеңіске жетті. kursiv.media
Матчқа дейін «Реал» жеті кездесу қатарынан жеңіп, турнир кестесінде көш бастап тұрған. Оның ішінде Чемпиондар лигасында «Олимпик Марсельді» 2:1 есебімен ұтқан болатын. Ал «Атлетико» тоғызыншы орында еді және алғашқы турда «Ливерпульден» жеңіліп, қиын жағдайда жүрген.
Ойын басталғаннан-ақ Диего Симеоне шәкірттері белсенді қимылдады. 14-минутта Робин Ле Норман есеп ашты – 1:0. Алайда көп ұзамай Килиан Мбаппе мергендігімен танылып, таразы басын теңестірді. Кейін Арда Гюлер әдемі соққымен «Реалды» алға шығарды – 1:2. Бірақ алғашқы тайм соңында Александер Серлот есепті қайта теңестірді – 2:2.
Екінші кезеңде шешуші сәттер орын алды. 51-минутта Хулиан Альварес пенальтиден мүлт кетпей, алаң иелерін алға шығарды. Ал 63-минутта дәл өзі айып соққысынан көзге түсіп, дубль жасады – 4:2. Қорытынды нүктені Антуан Гризманн қойды – 5:2.
Бұл жеңіліс – «Реалдың» жаңа маусымдағы алғашқысы. Енді Хави Алонсо баптайтын команда 30 қыркүйекте Алматыда өтетін матчта «Қайратпен» кездеседі. Ойын Орталық стадионда өтеді.
Жылдам ақпарат алу үшін Facebook, Instagram желілері мен Telegram каналымызға жазылыңыз!