Кеше қаламыздағы «Мұз айдыны» спорт кешенінде грек-рим, еркін және әйелдер күресінен 17-23 жасқа дейінгі палуандар арасында Қазақстан республикасы чемпионатының салтанатты ашылу рәсімі өтті.
Салтанатты шараны облыс әкімінің орынбасары Қайрат Нұртай ашып, барша қатысушыларға сәттілік тіледі. Ол Сыр төрінде осындай жоғары деңгейдегі жарыстың өтуіне атсалысқан барша жандарға алғысын білдіріп, облыс әкімі Нұрлыбек Нәлібаевтың құттықтауын жеткізді.
«Сайдың тасындай» кіл мықтылар бас қосқан дүбірлі додада Азия құрлығының және ҚР Біріккен Күрес федерациясының президенті, КСРО-ның 7 дүркін чемпионы, Әлем чемпионы, Азияның 2 дүркін чемпионы, Олимпиада ойындарының 2 дүркін жүлдегері, Қазақстанға еңбек сіңірген жаттықтырушы Дәулет Тұрлыханов бастаған қадірлі қонақтар өз лебіздерін білдіріп, жеңімпаздар мен жүлдегерлерді марапаттау рәсіміне қатысты. Сондай-ақ Дәулет Болатұлы облыс әкімінің орынбасары Қайрат Ырзақұлұлына спортқа жанашырлық білдіріп, қолдау көрсеткені үшін «Алғыс хат» табыстады.
Тартысты бәсекеге 17 және 23 жастан аспаған күрестің әр стилінде 10 салмақ дәрежесінде 17 өңірлік командадан 1290 спортшы қатысуда. Оның ішінде Нұр-Сұлтан, Алматы, Шымкент қалалары және 14 облыстан келген дүлдүлдер бар.
Республиканың әр түкпірінен жиналған спортшылар чемпионатты қыздыра түсті. Жарыстың алғашқы күні болғанымен, спортшылардың қарқыны өте мықты болды. Бірінші күннің нәтижесімен жеңімпаз, жүлдегер атанған палуандар марапат төрінен көрінді. Айта кететін жайт, кеше спортшыларымыз күрестің «еркін күрес» түрінен өнер көретті. Алдағы күндері палуандар «әйелдер күресі» мен «грек-рим» күресінен бақтарын сынамақ.
Естеріңізге сала кетейік, чемпионат YouTube хостингінде күн сайын тікелей эфирде көрсетіледі. Сонымен бірге «Qazsport» республикалық телеарнасы күн сайын әрбір жарыс күні туралы жедел ақпарат беріп отырады. Әр өңірдің үздіктерін жинаған боз кілемдегі жарыс 16 сәуірге дейін жалғасатын болады.
К.АҚТАН
Жылдам ақпарат алу үшін Facebook, Instagram желілері мен Telegram каналымызға жазылыңыз!