Жақында ғана аяқталған Бангкок қаласындағы 22 жасқа дейінгі Азия чемпионатында жерлесіміз Нұрсұлтан Алтынбек алтыннан алқа тағынған еді. Саңлағымыздың жеткен жетістігіне
Сыр жұртшылығы қуанды. Осы қуанышқа ортақтасып, спортшымен сұхбаттасқан едік.
– Қайырлы күн! Азия чемпионы болғаныңыз құтты болсын! Сіздің бокспен айналысуыңызға кім себепкер болды? Ең алғашқы бапкеріңіз жайлы айтып берсеңіз…
– Спортқа келуіме өзімнің Бекарыс есімді жиенім себепкер болды. Екеуміз бала кезден боксқа қызығып, бірге шұғылдана бастадық. Алғашқы ұстазым – Жаңабек Әлиев. Ағамызбен бірге біраз додада топ жардық. Жасөспірімдер арасында Азия біріншілігінің күміс жүлдегері, Жастар арасындағы Азия чемпионы атандым. Қазіргі таңда Қызылорда қаласының аға жаттықтырушысы Жамиль Жүсіповпен дайындық жұмыстарын өткіземін.
– Былғары қолғап шеберлерінен кімді үлгі тұтасыз?
– Қазақ еліне белгілі барша былғары қолғап шеберлерін үлгі тұтамын. Ешкімді бөле жармаймын. Барлығы да жол көрсететін ағаларым. Әрбір спортшының арманы тұғырдың ең биігіне көтеріліп, елінің әнұранын шырқату деп ойлаймын.
– Шыңдалу мақсатында қандай спортшылармен тәжірибе алмастыңыз?
– 2017 жылы Әлем чемпионы болған Қайрат Ералиев, 2021 Әлем біріншілігінде алтын алған Сәкен Бибосынов сынды ағаларыммен, Әлем чемпионатында күміс жүлде иеленген Махмуд Сабырхан бауырымызбен оқу-жаттығу жиынында тәжірибе алмасқанбыз. Қазақ боксшылары алдағы уақытта үлкен жетістікке жетеді деп ойлаймын. Осы мақсатта өзіміз аянбай еңбек ететін боламыз.
– Чемпион болғанда қандай күй кештіңіз?
– Азия чемпионаты өте жоғары деңгейде өтті. Біз үшін тәжірибе жинайтын біріншіліктің бірі болды. Әрине, жеңімпаз атанған соң көңіл-күйіміз көтеріңкі, барлығына дән ризамын. Дегенмен арманыма біртабан болса да жақындағандай күй кештім. Бұл жетістікпен тоқтап қалмаймыз. Алдағы жылдары халықаралық турнирлерге, Азия, Әлем чемпионатына тыңғылықты дайындық жұмыстарын жүргіземіз.
– Спорттағы басты арманыңыз қандай? Енді спортпен шұғылданып жатқан жастарға ақыл-кеңес айта өтсеңіз…
– Кез келген спортшының арманы – бірінші кезекте олимпиада жеңімпазы болу. Арманыма жету үшін бар күшімді саламын. Алда болатын Әлем чемпионаты мен Азия біріншілігінде топ жару – менің ең үлкен арманым. Ұстаздарымыз: «мықты спортшы болу кез келгеннің қолынан келеді. Бірақ чемпион болу – бәріне бірдей бұйыра бермейтін бақ» дейді. Осы бақ біздің басымызда ұзақ тұрса екен, – деп тілеймін.
Нұрдәурен ЖӘРДЕМХАН
Жылдам ақпарат алу үшін Facebook, Instagram желілері мен Telegram каналымызға жазылыңыз!